Marina Real ta expresa disponibilidad pa sostene Dia pa Cuida Aruba
ORANJESTAD - Prome Minister Mike Eman a ricibi den su oficina e comandante nobo di Marinierskazerne Savaneta, Luitenant-kolonel der mariniers Henk Buijs, pa un encuentro di cortesia y pa intercambia pensamento tambe tocante colaboracion entre Gobierno di Aruba y e mariniers.
Durante e encuentro, Prome Minister a gradici e comandante saliente, Luitenant-kolonel der mariniers Tim van Wijk, pa su dedicacion y servicio durante e ultimo cuater aña na Aruba, y a duna un bon bini na Luitenant-kolonel der mariniers Henk Buijs den su funcion nobo.
Un di e temanan cu a discuti tabata e iniciativa Dia pa Cuida Aruba, cu lo tuma luga dia 25 di juli. Prome Minister a invita e Marinierskazerne Savaneta pa considera con nan por contribui na e esfuerso nacional pa mantene Aruba limpi. Comandante Henk Buijs a indica cu e comparti e vision cu cuida Aruba ta un responsabilidad comparti. Segun e comandante, ta importante cu tur persona y organisacion na Aruba pone man hunto pa cuida e isla y mustra cu colaboracion por haci un diferencia real.
Sr. Buijs a indica cu, nan lo evalua e posibilidadnan pa participa dia 25 di juli, tambe e ta mira e iniciativa cu un vision mas amplio.
"Pa mi, no ta depende solamente di 25 di juli. Lo mas importante ta lo cual nos por significa pa otro den e periodonan cu ta sigui."
Como señal di aprecio durante e encuentro, Prome Minister Mike Eman a entrega ambos un copia di e buki “Volk van Veerkracht” di Luc Alofs y René Zwart. E publicacion ta relata e historia di resiliencia, perseverancia y fortalesa di pueblo Arubiano, y ta mustra con Aruba a logra desaroya su mes identidad y capacidad pa supera diferente reto durante generacionnan.
E encuentro ta resalta e bon relacion entre Gobierno di Aruba y Marina Real, basa riba cooperacion, compromiso y responsabilidad comparti pa contribui na bienestar di nos comunidad y cuido di nos isla.
Dia pa Cuida Aruba
"Dia Nacional pa Cuida Aruba" ta un iniciativa di Gobierno cu ta busca fortalece responsabilidad comparti den cuido di nos isla. Cu e lema "P'ami. P'abo. Pa nos tur.", e campaña ta invita ciudadano, empresa, scol, clubnan, fundacionnan y organisacionnan pa uni forsa den un gran accion nacional di limpiesa riba diasabra 25 di juli. Ademas di haci diferente area rond Aruba limpi, e iniciativa tin como meta crea mas concientisacion cu cuido di nos entorno ta un responsabilidad cu nos tur ta comparti.