Maneho pa regulacion y reduccion di ATV-UTV
ORANJESTAD - Recientemente, Ministerio di Transporte, Integridad, Naturalesa y Asunto di Adulto Mayor, a anuncia e introduccion di un maneho nobo pa regula y reduci e permisonan di Utility Task Vehicles (UTV) y All-terrain vehicles (ATV).
E maneho tin como meta pa mitiga e impacto desastroso pa nos naturalesa, e molester na e habitantanen y e siguridad di e usuarionan di dicho vehiculonan.
Pa varios aña ta purba di yega na un miho balansa entre turismo di aventura y proteccion di naturalesa. E uzo di UTV’s y ATV’s a trece un aumento di accidente cu daño fisico y material, daño na naturalesa (flora, fauna y propiedadnan geo-morfologico), ta causa molester pa e habitantenan (zonido y stof) y ta crea obstaculo den e fluho di trafico.
Gobierno di Aruba a instala un comision multidiscipliniario y un taskforce pa controla cumplimento di ley y reglamento relaciona cu vehiculonan di motor cu ta uza pa huur. Mientrastanto a reduci caravana na solamente 10 vehiculo pero esaki no ta suficiente.
A base di conseho ricibi for di Directie Natuur en Milieu y Departamento di Transporte Publico, den cooperacion cu e instancianan cu a forma parti di e comision di conseho, lo introduci diferente cambio, entre nan rutanan alternativo pa UTV y ATV den transporte publico, pa minimalisa e disturbio den nos naturalesa. Conservando y protehando nos areanan natural di vehiculo di motor, ta duna balor na nos ecosistema y economia.