Man den man den solidaridad: Gobierno ta pone enfoke riba prevencion y deteccion trempan di cancer di pecho

Como parti di e encuentro, a ilumina Bestuurskantoor den color ros como señal di solidaridad cu tur persona y famia afecta pa cancer di pecho.

E iniciativa a pone atencion riba prevencion, deteccion trempan, acceso na informacion y e importancia di sosten durante e proceso di cancer.

Minister Wyatt-Ras: e luz ta refleha atencion pa hende

Durante su discurso, Minister Melvin Wyatt-Ras a pone enfoke riba fortalesa, resiliencia y sosten. Ora un persona ta enfrenta cancer, apoyo di famia, comunidad, profesionalnan di salud y diferente instancia ta esencial pa sostene e persona durante e proceso y contribui na su bienestar y calidad di bida.

Tambe e la splica cu e iluminacion di Bestuurskantoor ta carga un mensahe cu ta bay mas leu cu e color ros.

“E luz ros cu ta ilumina nos Bestuurskantoor no ta solamente un luz briyante; e ta refleha nos atencion pa cada persona cu cancer ta toca: esun cu ta enfrenta e diagnosis, esun cu ta lucha, esun cu ta vence, esun cu ta recupera y esun cu ta sostene y cana banda di dje durante henter e proceso.”

E Minister a conecta e iniciativa cu e mision di e Ministerio pa sirbi ciudadano den cada fase di bida y contribui na bienestar fisico, mental, emocional y social.

El a enfatisa cu prevencion, informacion, screening y deteccion trempan ta parti importante di e agenda di salud. E prioridad ta pa sigui traha riba un sistema di cuido mas accesibel, caminda e ciudadano por haya informacion, orientacion y yudansa na tempo.

Gobierno tin un responsabilidad importante y cu colaboracion cu diferente profesional di salud, fundacion, institucion y otro partnernan ta indispensabel. E cooperacion aki ta esencial pa fortalece cuido y sosten na comunidad.

Den e contexto ey, e Minister a reconoce e contribucion di Fundacion ABO den prevencion, incluyendo e programa di screening BOB. El a menciona nan trabou pa acerca screening y orientacion na comunidad y a expresa sosten pa e campaña Make Aruba Pink – Haci Aruba Ros, cu ta motiva e hende pa tuma accion pa nan salud.

“Laga e luz ilumina tambe nos conocemento.”

Dr. Vanessa Williams: “Screening ta salba bida”

Dr. Vanessa Williams, radiologo y cofundador di Stichting BOB Aruba, a papia riba importancia di pasa di conscientisacion pa accion.

Stichting BOB a inicia e programa BOB pa screening di cancer di pecho pa awo ta forma parti di Fundacion ABO.

Dr. Williams a splica cu e programa ta existi 10 aña caba y cu e campaña Make Aruba Pink di e aña aki ta uza e color ros como un yamada pa tuma accion.

“Detecta trempan por salba bo bida.”

Dr. Williams a enfatisa cu conscientisacion tocante salud di pecho no mester cuminsa solamente ora un muhe yega edad di screening. El a splica cu for di edad di teenager, mucha muhenan por cuminsa examina nan propio pechonan aproximadamente un biaha pa luna, pa siña conoce nan curpa y reconoce loke ta normal pa nan. Asina, si un cambio presenta, nan por nota esaki mas facilmente y busca ayudo na tempo.

Segun Dr. Williams, for di 45 aña ta haci screening cu mammogram cada dos aña. Su yamada na muhenan eligibel tabata cla: no warda, busca informacion y haci bo cita.

Su mensahe final tabata directo: 

“Screening ta salba bida.”

Prome Minister Mike Eman ta comparti experiencia personal

Durante e encuentro, Prome Minister Mike Eman a comparti e experiencia personal di su famia ora su esposa, Sra. Doina Eman, a enfrenta cancer y a pasa door di tratamento.

El a papia tocante e impacto cu un diagnosis di cancer por tin no solamente riba e persona afecta, sino tambe riba su famia y esnan cu ta cana banda di dje durante e proceso. E Prome Minister a pone enfoke tambe riba e importancia di sosten emocional, presencia y solidaridad, y a recorda e apoyo cu su famia a ricibi durante un periodo particularmente dificil.

El a expresa tambe su profundo aprecio pa e profesionalnan di salud cu a brinda cuido na su esposa durante su tratamento. 

Su relato a reforsa e mensahe cu, banda di tratamento, e persona cu ta enfrenta cancer mester por conta cu comprension, presencia y sosten.