Lo instala camara y speaker den caya grandi
ORANJESTAD – Riba 23 di januari 2026, Minister di Turismo, Transporte y Labor mr. Wendrick Cicilia conhuntamente cu Minister di Finansa, Asuntonan Economico y Sector Primario Geoffrey Wever compaña pa Ronella Croes, CEO di ATA y Elton Arends di Oranjestad Investment Group a anuncia un proyecto pa Oranjestad.
E proyecto ta encera ponemento di camara di siguridad den areanan strategico di Caya Grandi, E ta cubri e necesidadnan cu tin n’e momentonan aki.
Lo instala un total di 43 camara di siguridad y 10 speaker tambe. Ta importante pa resalta e colaboracion cu tin entre sector publico y sector priva. Oranjestad Investment Group ta consisti di un grupo di inversionistanan motiva pa revitalisa nos centro di ciudad. Ya caba por mira diferente movecion den area di Oranjestad y Aruba Tourism Authority tambe ta sostene proyectonan cu tin un balor positivo pa nos comunidad.
Minister Cicilia a indica cu un di e misionan di Gobierno ta pa nos centro di ciudad bira un atraccion turistico, pa asina nos turistanan por disfruta di e experiencianan cu e comerciantenan tin pa ofrece.
E camaranan di siguridad lo contribui na e sentido di trankilidad cerca nos comerciantenan y eleva nos centro di ciudad.