Ley pa garantisa un cuenta bancario

E siguiente paso ta encera cu Raad van Advies lo cu duna conseho riba esaki y pa despues present’e na Parlamento di Aruba.

Segun Minister di Asuntonan Economico, Comunicacion y Desaroyo Sostenibel, mr. Geoffrey Wever, exclusion financiero ta un desaroyo cu sigur tin su atencion. Pues, un pilar di e maneho economico ta pa stimula inclusion financiero. “Cada ciudadano mester por tin un cuenta bancario basico pa por realmente participa den e sistema financiero. Tin hopi hende cu ainda no tin un cuenta bancario of ta nenga nan pa tin un cuenta bancario y esaki no ta aceptabel y pa e motibo aki Minister Wever kier introduci e ley aki.

Tin un cuenta bancario basico y e uzo di esaki ta un condicion necesario pa un economia duradero y fuerte. Pa crea e condicionnan necesario pa esaki, Ministerio di Asuntonan Economico, Comunicacion y Desaroyo Sostenibel, a pidi y ricibi di Banco Central di Aruba un concepto di ley pa stimula cada consumidor y compania pa por habri y uza un cuenta bancario basico na Aruba.

Diferente publicacion di entre otro ‘Organization for Economic Cooperation and Development’, Banco Mundial y ‘Europese Bankautoriteit’ ta indica e importancia di inclusion financiero. Participacion den e sistema financiero tambe ta esencial pa desaroyo y ta den liña cu e principio 2 di e Metanan di Desaroyo Sostenibel. Principio 2  (Leave No One Behind), no laga niun ciudadano atras, ta e promesa central y transormativo di e Agenda 2030 pa Desaroyo sostenibel di e Metanan di Desaroyo Sostenibel (SDGs).

Awor cu aprobacion di Conseho di Minister, e concepto di ley pa garantisa un cuenta bancario pa tur ciudadano ta cana e caminda legal pa su entrega na Parlamento di Aruba.