Laura Wernet-Paskel honra na Hulanda y pronto na Aruba tambe cu un caya na su nomber
ORANJESTAD – Riba 22 di october, Prome Minister Mike Eman a ricibi visita di varios miembro di famia di Laura Wernet-Paskel, particularmente Andre “Dechi” Wernet cual ta un persona cu tin un trayectoria largo y reconoci na Aruba.
Andre “Dechi” Wernet ta yiu di un personalidad hopi grandi den historia di Aruba. Laura Simona Paskel (1911-1962), conoci como Laura Wernet-Paskel, tabata e prome ser femenino riba un lista politico ( Partido UNA ). Sra. Wernet-Paskel tambe tabata maestra di scol y escritor, cu a laga un historia bunita atras, entre otro e buki titula ‘Ons eilantje Aruba’, di cual Prome Minister a ricibi un ehemplar original for di man di un di su yiunan.
Durante su recien bishita na Hulanda Prome Minister Eman, compania di consehero/secretario general Robert Candelaria, cu tambe ta miembro di famia Wernet-Paskel a cana den caya, cu mas bien ta un hof na Hulanda dedica na honor di Laura Wernet-Paskel. Gemeente Den Haag na 2021 a nombra un caya, Laura Wernet-Paskelhof, den un bario nobo den e parti di ciudad Escamp, na su honor.
Ta un orguyo grandi cu a nombra un hof na nomber di un Rubiano. Famia di su banda kier a gradici Prome Minister pa e bishita na e hof durante su estadia na Hulanda .
Na Aruba tin un scol cu ta carga nomber di Laura Wernet-Paskel y ta spera cu pronto lo nombra un caya na su nomber na Aruba.
Pa famia Wernet-Paskel ta un honor di mira cu den ocho personalidad cu a yega di haya un caya na su nomber na Hulanda, un di nan, e unico Rubiano ta Laura Wernet-Paskel.
Un peticion pa un Caya Laura Wernet-Paskel ta e deseo di famia y ta spera cu pronto e peticion aki keda honra y bira realidad aki na Aruba tambe.