LATAM Airlines ta expande cantidad di vuelo directo for di Lima pa Aruba
ORANJESTAD- AUA Airport y Aruba Tourism Authority (A.T.A.) ta anuncia e decision di LATAM Airlines di aumenta e frecuencia den su servicio directo di mas recien esta Lima y Aruba (LIM-AUA).
E aumento aki ta demostra un paso significativo den fortalece e conexion entre e dos destinacionnan aki, atendiendo e demanda creciente di biahe di y pa Aruba.
Cuminsando desde e prome trimester di aña 2024, specificamente den luna di juli, LATAM Airlines lo aumenta su vuelonan LIM-AUA for di tres vuelo pa siman pa cuater vuelo pa siman, introduciendo un servicio adicional riba dialuna, agrega na e vuelonan actual di diahuebs, diasabra y diadomingo. E decision pa amplia e serivicionan a bin debi na e demanda creciente di biahe pa cu e ruta LIM-AUA y claro, debi na e exito di e oferta actual di LATAM.
E aumento di frecuencia tin como meta pa brinda e pasaheronan mas flexibilidad y opcion na momento cu nan ta planea nan biahe no unicamente entre Lima y Aruba sino tambe pa e otro destinacionnan den Sur America cu LATAM ta bula, incluyendo Argentina, Brasil, Chile, Paraguay y Uruguay. E distribucion actual di trafico den e vuelonan di Lima ta indica cu Peru ta sigui ta e esun di mas grandi di e mercado cu un 40%, sigui pa Chile cu 30%, Argentina cu 25% y Brasil cu 5%.
Detaye di vuelo
E ampliacion di e ruta Lima-Aruba awo lo opera cuater biaha pa siman, riba dialuna, diahuebs, diasabra y diadomingo y lo bula cu un avion modelo A320 cu disponibilidad di no menos di 174 stoel. Por reserva pasashi riba e website di LATAM HTTPS://WWW.LATAMAIRLINES.COM/CL/ES of a traves di bo agente di biahe preferi. Lo cuminsa bende e servicio nobo aki entrante fin di e luna aki.
Ruta | Ora di salida | Ora di yegada |
---|---|---|
AUA-LIM | 6:45 PM | 9:40 PM |
LIM-AUA | 12:00 PM | 5:05 PM |
