Lansamento Proyecto di Reforestacion di Aruba

Francielle Lacle di e Ministerio di Naturalesa y Medio Ambiente a expresa durante e ceremonia di lansamento, "Nos ta na e momento corecto pa tuma accion. E meta ta grandi, pero nos tin fe cu, hunto cu nos comunidad y stakeholdernan, nos por logra esaki."   

E matanan lo ta planta den zona urbano y rural, incluyendo mondi, bario, scolnan y espacionnan publico. 

E beneficionnan ta hopi: 

• Pa e area urbano, mas sombra y temperatura mas fresco;
• pa e medio ambiente marino, menos sedimentacion riba nos coralnan;
• pa e biodiversidad, un aumento den e variedad di especie y proteccion di matanan endemico y menasa.

E proyecto ta cay bou di e plan nacional pa biodiversidad cu Aruba a desaroya pa 2024–2030, yama NBSAP (National Biodiversity and Strategic Action Plan). Lacle a enfatisa cu e sorto di matanan lo inclui matanan di fruta, matanan endemico y matanan cu ta den peliger di disparce.

Ministerio di Naturalesa y Medio Ambiente ta ehecuta e proyecto aki hunto cu 27 organisacion local, incluyendo no solamente entidadnan ambiental manera Ban Lanta y Planta, Syntropic Farming, Ecoliving y Aruba Conservation Foundation, pero tambe negoshi, scol, sector turistico y priva. "Nos no ta haci e trabou nos so. Nos kier empodera y uni e esfuersonan cu ya ta wordo tuma," Lacle a enfatisa.

Como siguiente paso, lo forma un stuurgroep cu lo sirbi como grupo di guia, y un klankenbord dinamico, unda organisacionnan por duna input riba tema relevante, manera maneho di awa. "Esaki ta un proceso participativo, un movecion pa yega na un Aruba mas berde, mas fresco y mas fuerte," Lacle a conclui.