Joost Meijs a traspasa presidencia di Dutch Caribbean Cooperation of Airports pa Jonny Andersen

A tuma e decision unanimamente durante e reunion colectivo di DCCA cu a tuma luga riba 11 di maart 2024. Joost Meijs tabata presidente desde e inicio di DCCA na aña 2021.  

Desde su inicio, e seis aeropuertonan di Caribe Hulandes ta cooperando mas intensamente mediante intercambio di conocemento, realisacion di inspeccion di siguridad y colaboracion estrecho cu demas stakeholder p’asina mehora e conexion (accesibel, eficiente y sostenibel) entre e islanan di Caribe Hulandes. DCCA ta fungi como un punto di contacto central den Caribe Hulandes p’e stakeholdernan importante den e industria di aviacion. DCCA su intencion ta pa mehora e conexion entre e islanan y ta considera cu Caribe Hulandes ta posiciona pa bira un lider mundial den tur e maneranan sostenibel di biaha.  

Cada aña DCCA, cu sosten di e aeropuerto anfitrion, ta organisa e conferencia “A Flight to the Future”. Na  2022 a organisa e conferencia aki pa prome biaha na Aruba. Durante e prome edicion, e prome avion electrico a lanta vuelo rumbo p’e espacio aereo di Caribe. Na aña 2023, Aeropuerto di Corsou, a sigui cu ne y a organisa e di dos edicion di e conferencia cu un demostracion impresionante di drone. Riba 18 y 19 di november di e aña aki lo por conta cu e di tres edicion cu lo tuma luga na St. Maarten. Durante e conferencianan, henter e ecosistema di aviacion den Caribe Hulandes ta reuni pa combersa riba ambicion, tema actual y tendencia nobo como tambe innovacion den e industria di aviacion (regional).  

Jonny Andersen, e presidente nobo, a expresa su mas sincero gradicimento na Joost Meijs pa su liderazgo yena cu vision y destaca pa Dutch Caribbean Cooperation of Airports (DCCA). Bou  liderazgo di Joost Meijs, DCCA a converti den un bos pa e aeropuertonan Hulandes den Caribe, representando e interes comun di e seis aeropuertonan n’e gobiernonan, comunidad insular, e aerolineanan asocia y demas stakeholder.