IOC-UNESCO a reuni expertonan y dirigentenan na Brasilia pa trata desafionan maritimo den e region di America Tropical y Caribe

E Reunion Tecnico di Ciencia, teni dia 22 di April, a reuni expertonan y representantenan na nivel halto di tur parti di e region pa discuti e realidadnan cientifico di un lama cu ta birando mas cayente y su impacto riba comunidadnan cerca di lama, ecosistemanan y economianan. Presentadornan a enfatisa esfuersonan nacional pa adapta na cambio climatico, fortificacion di sistemanan di advertencia tempran, y promove conocemento yi cuido sostenibel di lama.

Durante e Reunion Tecnico di Ciencia Reino Hulandes a wordo bon representa door di cuatro orador:

• Dr. Marck Oduber di Aruba a introduci e reunion unda a indica cu mester accion urgente pa adresa e aumento di temperatura di lama di e region y resaltando e necesidad pa un ciencia integra, gobernacion inclusivo, y solucionan alinia cu e SDGs pa garantisa un futuro di nos lama regional cu ta resistente y sostenibel;
• Ex-Minister di Medio Ambiente di Aruba, Ursell Arends BSc, a destaca beneficionan di inclui Derechonan di Naturalesa den Constitucion Nacional;
• Dr. Ryan Peterson di Aruba a duna un update riba e iniciativa CORVI (Climate and Ocean Risk Vulnerability Index) pa Aruba;
• Jonathan Zoetrum, MSc di Corsou a duna un update riba e iniciativa Inteligencia Artificial (AI) den tareanan di Meteo Corsou. 

Fuera di e oradornan di Aruba tabata tin diferente otro oradornan di otro paisnan i/o instancianan, cu a resumi e estado di clima regional y e pronosico relata na cambio climatico, a destaca importancia di fortifica sistemanan di advertencia tempran, respuesta na calentamento di lama y florecemento peligroso di alga, y e necesidad pa solucionan natural pa resilensia pa areanan cerca di lama.