Inversion y plan grandi ta continua pa Caya Grandi y centro di ciudad
ORANJESTAD – Riba 8 di october a tuma luga un recorido den centro di ciudad, caminda Minister di Infrastructura, Energia y Telecomunicacion Gervais R. (Baba Herdé) como Minister di Finansa, Asuntonan Economico y Sector Primario Geoffrey Wever, acompaña pa varios inversionista/ comerciante, a haya informacion valioso riba e status di diferente edificio den centro di ciudad.
Representante di e grupo grandi di inversionista, Elton Arends a comparti e intencion- y plannan cu tin cla pa diferente edificio den Caya Grandi. Hopi di nan ta den pleno renobacion of pronto lo cuminsa cu e proceso aki.
Henter e renobacion di centro di ciudad ta yena di ideanan creativo cu ta haya for di e bon cooperacion di e comerciantenan, inversionistanan y habitantenan di Caya Grandi.
Di parti di gobierno lo haci uzo di diferente recurso pa logra e meta aki, cual por ta den forma fiscal, legal, facilidad cu por duna, manera permiso (precario) pa stimula inversion.
“Tin cu bay bek na bida normal den Caya Grandi”
Minister Herdé ta mira un Caya Grandi caminda hende ta biba aden, caminda restaurant ta keda habri den oranan mas laat y asina stimula e bida bek den centro di ciudad.
Intencion ta pa cuminsa cu e dos cayanan principal, cu ta Caya Betico Croes y Wilhelminastraat pa despues continua den e area rond di John G. Emanstraat, di Rancho, y un parti cu ta yega Dakota, Companashi y den centro.
No ta anticipa cu lo finalisa e plan completo den e proximo tres añanan pero si cu Aruba, bou maneho di cualkier partido den gobierno, realisa cu esaki tambe ta Aruba, su economia, unda hende ta biba. P’esey tin cu inverti den dje y crea e bida cu nos kier pa Aruba, aki den centro di ciudad tambe.
Esaki ta apenas e comienso y tin hopi mas pa haci. Ta habri pa tur cu tin idea y ta dispuesto pa inverti pasobra e no ta pa gobierno, sino pa Aruba henter.