Inversion di 17 miyon florin den careteranan rond Aruba
ORANJESTAD -- Mirando cu e aña aki tin un surplus den e presupuesto di Pais Aruba, Prome Minister Evelyn Wever-Croes a anuncia cu hunto cu Departamento di Obra Publico (DOW), lo bay inverti un total di 17 miyon florin den careteranan rond di Aruba.
Tin varios reto na momento cu mester asfalta of drecha caminda, mirando cu ta solamente un planta di asfalt tin y esey no tur ora por cumpli cu e demanda. Tambe sa planea pa asfalta camindanan di santo, pero ta topa cu por ehempel palo di luz mei mei riba e caminda, of cura di cas cu ta riba caminda of tuberia cu mester pasa bao caminda ainda.
Por lo tanto no ta tur e retonan ta den man di DOW pero si nan ta atende cu esakinan y e caminda ta keda den e planning.
DOW a presenta resultado di un estudio cu nan a haci riba con den un periodo largo por drecha tur caminda na Aruba. Eynan a yega na e conclusion cu pa e siguiente 15 aña lo mester inverti 17 miyon florin cada aña den asfalta e camindanan di santo y drecha tur cu e camindanan cu ta den mal estado. Pa e aña aki tin 17 miyon florin disponibel pa asfalta camindanan di santo y pa traha riba e mantencion di e careteranan di asfalt cu ta den mal condicion.
DOW ta aplica un sistema pa pone prioridad riba careteranan, dependiendo di e estado di e caminda, e costo di drecha un caminda di santo cada biaha, e cantidad di habitante y frecuencia con hopi ta uza e caminda en particular.