Iniciativa pa cambio den orario di trabou na Aruba

Aruba no ta scapa di cambio climatico na nivel global. Ya caba Aruba ta afecta pa olanan di calor y den futuro esakinan lo bira mas frecuente, intenso y dura mas. Entre esnan cu ta afecta directamente tur dia ta nos adultonan mayor y nos trahadonan cu ta labora pafo sin sombra y airco.

Nos leynan laboral ta traha den otro decada. Algun ta basa riba e conceptonan di otro siglo y riba modelo economico anticua y cu no ta cuadra cu e tempo aki. No por sigui traha cu leynan cu ta obliga trahadonan traha ora nan largo den solo y cu temperatura halto.

Segun Minister di Transporte, Integridad, Naturalesa y Asunto di Adulto Mayor Ursell Arends, leynan laboral na Aruba mester reconoce y adapta na e cambio climatico. Mundo ta cambiando y mester adapta na esey. Mientrastanto a invita tur sindicato pa un reunion y a convoca diferente gremio di sector priva pa cuminsa cu sondeo riba e tema di cambio na leynan laboral. Esaki mester ta un proceso participativo y democratico.

Recientemente Minister Arends a reuni cu e National Climate Resilience Council (NCRC), e autoridad na Aruba riba tereno di cambio climatico. A pidi NCRC pa prepara y entrega prome cu dia 30 di augustus un rapport profundo (white paper) den cual ta delinea e miho practicanan mundial pa loke ta adaptacion di leynan laboral pa e efectonan di cambio climatico. Tambe pa indica den forma concreto kico ta pasonan cu Gobierno di Aruba por tuma riba tereno laboral den cuadro di adaptacion climatico.

Unabes cu e informacion crucial pa tuma decision (decision-critical information) ta cla, lo pone e tema aki riba agenda di Conseho di Minister. E informacion lo enfatisa e necesidad pa cambio y lo duna indicacion kico por haci y ta rekeri participacion di diferente ministerio pa por logra e cambio aki.