Impacto positivo den crecemento di gasto di ‘Restaurants & Dining’ den di dos kwartaal 2024

Conforme informacion di tarheta di credito Visa, unabez e turista ta na Aruba y ya a regla su estadia y buelo, locual e usuario ta genera mas pa Visa, ta locual e ta gasta na “Restaurants & Dining”. Esaki a subi cu 17.9% den Q2 2024, compara cu e mesun temporada den 2023. A.T.A. ta monitor e patronchi di gasto a base di varios estadistica entre otro pa medio di Visa, Master Card, encuestanan y Banco Central di Aruba.

A.T.A ta trahando pa un era nobo, caminda cu lo pone enfasis pa mehora y mantene esfuersonan pa logra e balance segun e modelo di High Value-Low Impact cu ta consisti di cuater pilar; Calidad di bida di e residente, Calidad di experiencia di e bishitante, Proteccion y preservacion di naturalesa y medio ambiente, y Contribucion Economico na nos isla. Lo enfoca na atrae e bishitante cu lo inverti mas (calidad en bes di cantidad). Alabes, lo atrae e bishitante cu ta mas consciente, y ta balora y proteha nos cultura, naturalesa, tera, awa, nos hende, y nos economia.

Estadistica conforme actualisacion den e industria di turismo:

Volumen (“stayover”) cu resultado adicional di 9.4% den juli 2024 compara cu juli 2023.
Conforme e demanda por bai mira tambe cu e aerolineanan lo sigui expande capacidad y asina permiti nos captura e demanda. Den juli 2024, Aruba a ricibi un total di 123,437 bishitante “stayover”, esaki ta un crecemento di 9.4%, si compara cu juli 2023, unda a ricibi 112,874 bishitante “stayover”.

Mercadonan y categoria di acomodacion

Den juli 2024, 78.5% di e total di e bishitantenan “stayover” pa Aruba a bishita for di Norte America, 4.4% a bishita for di Europa, 14.2% a bishita for di Latino America y 2.8% tawata procedente di otro partinan di mundo.
Den juli 2024, 25.7% di bishitante a keda den hotelnan European Plan, 16.7% a keda den hotelnan All-Inclusive, 25.5% a keda den Timeshare, y 32.1% a keda den otro tipo di acomodacion, conoci tambe como short-term vacation rentals

Short-Term Vacation Rentals (STVR)

A.T.A. tin acceso na un plataforma unda por wak e cantidad di cas, apartamento y villas cu ta uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Den 2023, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo.

Si compara juli 2024 cu juli 2023 por wak cu e ocupacion averahe di e acomodacionnan aki a subi cu 4.1%, for di un averahe di 46.4% na juli 2023 pa un averahe di 50.5% na juli 2024.
Den caso di entrada, si compara juli 2023 cu juli 2024 por wak cu e categoria a genera un crecemento den entrada di 19.84%.

2024 (Year to Date): Te cu juli 2024, Aruba a ricibi un total di 861,128 bishitante “stayover”, esaki ta un crecemento di 17.5% compara te cu juli 2023, unda a ricibi 732,593 bishitante “stayover”. Ora ta yega na lider den mercado, te cu juli 2024, 81.1% di e bishitantenan ta di Norte America, 4.5% ta di Europa, 12% ta di Latino America, y 2.4% tawata procedente di otro partinan di mundo.