Groundbreaking na WEB pa e planta nobo di SWRO-3 BOOT

Na april 2024 WEB y Seven Seas a firma e acuerdo Build-Own-Operate-Transfer (BOOT) pa sigura suficiente produccion di awa di bebe na un prijs rasonabel pa nos isla durante e proximo dies añanan.

Realisacion di SWRO-3 BOOT ta hopi importante pa WEB por trata na tempo e retonan cu e facilidadnan di produccion existente. SWRO-3 BOOT ta forma parti di WEB su trayecto di proyectonan strategico di awa di bebe y ta conecta cu e “control center” nobo, di cual a haci su groundbreaking na september ultimo.

Pa e ocasion aki, Minister di Husticia y Energia mr. drs. Arthur Dowers a asisti na e groundbreaking y a duna un discurso, elogiando gerente di WEB pa e logro importante aki. Cu e SWRO-3, WEB por genera y garantisa suficiente produccion di awa pa cubri Aruba. Hunto cu Seven Seas Water Group, lo inicia cu e planta nobo aki di SWRO-3 cu lo mester keda cla pa juni 2026. Esaki ta un inversion di 10 miyon florin, pa e planta di SWRO-3 Boot y lo mester cumpli cu e demanda no solamente actual sino pa futuro tambe.

Director ing. Alfredo Koolman di WEB Aruba N.V. a reconoce e empleadonan di WEB pa percura pa Aruba tin awa limpi pa mas cu 93 aña. E trabao den e planta no tur ora ta bay sin problema pero e dedicacion di e personal ta crucial pa mantene e produccion optimal. Pa atende cu e retonan, lo mester haci inversionnan substancial den e planta. Sr. Koolman a expresa cu financiamento di e proyectonan strategico di awa ta hopi critico y tin su atencion completo. E tin confiansa cu e financiadonan tambe lo contribui na e obhetivo hopi importante aki, pa garantisa cu na cada momento tin suficiente awa potabel na Aruba.

Koolman ta premira cu den 8 luna lo bin hunto atrobe pero pa celebra e entrega di SWRO-3.

Henry Charrabe, CEO di Seven Seas Water Group a indica cu e planta nobo di SWRO-3 BOOT por procesa entre 16500 m3 y 19000 m3 pa dia, y tin e meta pa no solamente garantisa awa pa awo pero tambe pa futuro. E acuerdo aki tin un duracion di 10 aña y e proyecto ta conta cu 90% di personal for di e mercado laboral local.

Minister Dowers a felicita e director di WEB y expresa su confiansa den e director y personal di WEB cu ta haciendo un bon trabao y tin vision pa cumpli cu e necesidadnan di pueblo pa futuro. Tin un consistencia solido di parti di e companianan di utilidad pa produci awa y energia pa comunidad por drumi den airco of bebe awa limpi. Minister Dowers a felicita cada un den WEB pa nan trabao duro.