Gobierno ta sostene iniciativa di sterilisacion di cacho y pushi

Luna Foundation Aruba, Crossroads Animal Aid, Paws United y Stimami Sterilisami Foundation hunto a organisa e evento importante aki. Danki na Stimami Sterilisami Foundation cu a cubri tur e remedinan cu a haci e evento di sterilisacion y castracion di forma gratuito.

Durante e bishita, Prome Minister Mike Eman a expresa su aprecio pa e trabou extraordinario cu e boluntarionan y organisacionnan ta haciendo.  “Aruba ta bendiciona cu un iniciativa masha bunita lidera pa Zoey y un grupo di boluntario for di Merca. Un grupo di 55 profesional ta dedica nan tempo pa opera cacho y pushi pa sterilisa nan, pero tambe pa verifica nan estado di salud. Si nan tin bichi, infeccion of hasta lesion fisico, nan ta haya tratamento medico. Mayoria cacho y pushi ta yega na e cuido aki door di nan propio doño, mientras Marina Hulandes tambe ta trece varios cacho y pushi cu nan ta haya riba caya.  "Nos tey pa mustra nos sosten pa e esfuerso aki. Esaki ta un iniciativa hopi importante pa Aruba. Tin demasiado cacho y pushi riba caya y esaki no ta bon pa e bestianan, no ta bon pa nos comunidad y sigur no ta representa e manera cu nos kier trata nos mascotanan". Ta hopi special pa mira cu organisacionnan internacional ta dispuesto pa bin Aruba riba nan propio gasto, pasa un siman aki y yuda nos cu sterilisacion, tratamentonan medico y cuido di bestia. E sosten aki ta mustra e importancia di traha hunto pa crea un miho futuro pa nos bestianan y pa nos comunidad.

Karyn Franz, fundador di Crossroads Animal Aid, a splica cu su organisacion ta consisti di boluntarionan cu tin un pasion profundo pa bienestar di bestia y control di poblacion di bestia.  “Crossroads Animal Aid ta un organisacion sin meta lucrativo cu ta trece hunto boluntarionan cu tin un amor grandi pa bestia y cu ta kere den sterilisacion y castracion como un solucion. Durante henter aña nan ta organisa gruponan di profesional pa participa den e tipo di misionnan asina. E aña aki nan a trece 55 persona pa reduci reproduccion indesea bou di e cacho y pushinan di caya y preveni pa mas cacho y pushi keda sin hogar.”

Kelly Reagan, DVM y miembro di e team veterinario di Merca, a subraya e importancia di colaboracion internacional y e impacto cu e tipo di programa aki por tin riba e bienestar di e animal. "Tin un grupo di veterinario na Merca cu tin training special pa realisa un cantidad grandi di sterilisacion y castracion den un periodo cortico di tempo. Ora cu nos por bin y uza e conocemento ey pa yuda paisnan cu ta enfrenta retonan cu poblacion di bestia di caya, nos sa cu nos ta haciendo un diferencia real."

Zoey ta un ehempel perfecto di un persona cu realmente ta preocupa pa e bienestar di animalnan y cu sa con pa haya e recursonan necesario pa haci iniciativanan manera esaki posibel.  Zoey Konijn di Luna Foundation Aruba a enfatisa cu e mision principal di e esfuerso aki ta pa reduci e cantidad di cacho y pushi cu ta biba riba caya y promove cuido responsabel di mascota. “Tur hende sa cu nos curason ta bati pa mira menos animal riba caya y mas animal den un cas sigur cu nan doño. P’e motibo ey nos a reuni e profesionalnan aki pa Aruba. Nan ta aki pa yuda e comunidad y pa brinda atencion na mascota cu mester di cuido.

E iniciativa aki ta mustra con colaboracion entre organisacionnan local y internacional por crea un diferencia real den bida di gran cantidad di pushi y cacho y contribui na un Aruba cu mas responsabilidad, compasion y cuido pa mascota. Prome Minister Mike Eman a reconoce e esfuerso colectivo di tur boluntario, veterinario y organisacionnan envolvi den e iniciativa aki. Mike Eman a subraya cu colaboracion, dedicacion y compromiso manera esaki ta hunga un rol importante pa sigui mehora bienestar di e animalnan y pa construi un comunidad mas responsabel y consciente na Aruba.