Gobierno ta presenta un incentivo fiscal pa stimula participacion di nos pensionadonan den mercado laboral
ORANJESTAD – Minister di Finansa, Asunto di Economico y Sector Primario, Geoffrey Wever, conhuntamente cu Minister di Turismo, Transporte y Labor sr. Cecilia y Minister di Cuido di Adulto Mayor Mervin Wyatt-Ras a haya sosten di Conseho di Minister despues di a haci un peticion pa haci un cambio di ley di inkomstenbelasting pa introduci un deduccion fiscal adicional pa pensionadonan 65+ cu ta traha activamente riba nos mercado laboral.
Manera ta conoci Aruba ta enfrentando un scarcedad structural di personal den diferente sectornan di nos mercado laboral. Nos pensionadonan, cu nan conocemento y experiencia extenso, por duna un aporte sumamente valioso na nos mercado laboral. Na e momento aki participacion den mercado laboral pa pensionadonan no ta algo atractivo debi cu e entrada adicional cu nan genera banda di nan pension ta hiba nan den un categoria (mas) halto di belasting.
E proposicion presenta na Conseho di Minister lo duna un deduccion fiscal adicional di Afl. 10.000 na tur persona di 65+ cu ta desea di sigui traha activamente banda di nan pension.
Esaki ta un instrumento di maneho concreto di gobierno cu tin diferente efecto positivo:
- Aumento di participacion laboral di pensionadonan cu ta desea di sigui activo den mercado laboral;
- e pensionado por sigui aporta cu nan conocemento y experiencia;
- envolvimento social di e pensionado;
- un alivio riba e presion cu tin den e mercado laboral.
Minister Geoffrey Wever a elabora:
“Cu e proposicion aki nos ta duna nos pensionadonan adulto mayor un oportunidad pa sigui contribui y participa activamente na nos sociedad. Nan conocemento, habilidad y experiencia extenso ta di gran balor pa nos sociedad y e proximo generacion y tin alabes efecto positivo pa nos economia y nos mercado laboral.”
Awor a aproba e incentivo aki den Conseho di Minister di Gabinete AVP-Futuro, e proceso di cambio di e ley di inkomstenbelasting lo inicia.
