Gobierno ta anuncia aumento di yudansa social pa famianan vulnerabel
ORANJESTAD- Prome Minister mr. Mike Eman, hunto cu Minister di Salud Publico, Asunto Social, Cuido di Adulto Mayor y Maneho di Adiccion drs. Mervin Wyatt-Ras, a anuncia un serie di aumento strategico den e programa di asistencia social, cu lo bin na vigor den aña escolar 2025-2026.
Tur comienso di un aña escolar nobo ta trece gasto extra pa famianan, manera compra di articulonan di scol, transporte y contribucion di mayornan. Pa famianan cu ta depende di bijstand, specialmente solteronan y esnan cu yiu cu ta bay scol, e gastonan aki ta un peso grandi.
Mirando cu nan situacion financiero ta fragil, Gobierno a haya necesario pa ahusta e sosten actual, pa garantisa igualdad social y oportunidad igual den e siguiente forma:
- Aumento di ‘schooluitkering’ pa compra di articulonan di scol
Pa alivia e peso financiero riba famianan cu ta depende di bijstand, lo duna un aumento anual durante luna di augustus of september 2025 pa yuda cu e compra di articulonan escolar necesario.
• Actualmente, e suma ta AWG. 220,00 pa cada mucha/yiu cu ta bay scol, cu un maximo di AWG 800 pa cada famia.
• Cu e ahuste nobo, e suma ta subi pa AWG. 250,00 pa cada mucha/yiu, cu un maximo di AWG 1.000 pa famia. - Aumento di contribucion di mayornan na schoolgeld.
Departamento di Asunto Social ta contribui na e gasto di schoolgeld pa famianan cu ta depende di bijstand via un ‘contribucion di mayor’ anual.
• Actualmente, e suma ta AWG. 120,00 pa cada mucha/yiu.
• Cu e ahuste nobo, e contribucion ta subi pa AWG. 250,00 pa cada mucha/yiu. - Aumento di ‘maandelijkse schooltoeslag’
E ‘schooltoeslag’ mensual ta destina pa famianan cu ta depende di bijstand y cu tin yiunan entre 3 y 24 aña cu ta sigui voltijds dagonderwijs (estudio durante dia na full-time).
• Actualmente, e suma ta AWG. 250,00 pa cada mucha/yiu pa luna.
• Cu e ahuste nobo, e suma lo bira AWG. 300,00 pa luna. - Aumento di bijstand basico pa tur hende
Pa sigura cu e sistema di sosten social ta refleha e realidad socio-economico actual, lo aumenta e suma mensual pa tur hende.
• Actualmente, e suma di bijstand ta AWG. 450,00 pa luna.
• Cu e aumento nobo, e suma lo subi pa AWG. 600.00 pa luna
Gobierno ta reafirma su compromiso pa sosten esnan mas vulnerabel den nos comunidad, y pa crea un base di oportunidad igual pa tur mucha y famia na Aruba.