ORANJESTAD - Recientemente Prome Minister Evelyn Wever-Croes,  Minister Xiomara Maduro y Minister Endy Croes, Director di Archivo Nacional sr. Raymond Hernandez y Directora di Biblioteca Nacional sra. Astrid Britten, a reuni cu fundado di "Internet Archive" sr. Brewster Kahle y Director di Library Services di Internet Arhive sr. Chris Freeland.

Un topico hopi importante cu a trata ta digitalisacion y con pa yega na biblioteca digital na Papiamento cu e meta pa nos conserva nos idioma y haci’e accesible pa mas hende.

Sr. Kahle ta un figura pionero den preservacion y acceso digital, e ta un bibliotecario digital y fundado y director di Internet Archive. Internet Archive, funda na 1996, ta un biblioteca digital gratis cu ta archiva documentonan di World Wide Web y ta haci nan universalmente aceptabel y accecibel pa tur hende y na tur parti di mundo.
Internet Archive a bira un di e bibliotecanan digital mas grandi y mas significante globalmente, incorporando un variedad amplio di material manera buki, website, musica, video, y hopi mas. Dedicacion di sr. Kahle pa preservacion di herencia digital y promocion di acceso universal na informacion, a gana reconocimento y aplauso amplio den e terenonan di tecnologia, biblioteca y hopi mas.

Prome Minister ta gradici su coleganan cu a atende e reunion interesante aki, Director di ANA, Directora di BNA y tambe sr. Kahle y sr. Freeland kendenan a trece informacionnan hopi importante y interesante dilanti. 
 

Gobierno a reuni cu fundado di "Internet Archive"