Gobierno a haya update di e negosacion pa yega na un Rijkswet
ORANJESTAD – Diaranson dia 6 di augustus, Prome Minister Evelyn Wever-Croes y Minister di Finansa y Cultura Xiomara Maduro, a reuni cu e grupo di experto responsabel pa negosha riba e Rijkswet pa haya un update.
Recientemente Gobierno a cera un acuerdo cu Hulanda riba e tema di refinanciamento di e debe. Un di e condicionnan di e acuerdo, ta pa Aruba bin cu un tipo di Rijkswet den cual ta regla algun aspecto di supervision financiero. E acuerdo ta indica cu den un Rijkswet ta bin e definicion di e normanan y den un ley local, esta un landsverordering, ta bin e normanan mes. Parlamento di Aruba mester defini e normanan, cambia normanan y bin cu normanan nobo. Esey ta e palabracion cu a haci y despues di esey ta bin un periodo pa negocia pa yega na un Rijkswet.
Un delegacion di Hulanda tabata na Aruba y a negocia cu e ekipo di Aruba. E negosacion a bay bon y tin algun asunto cu ya caba tin consensus riba nan, mientras algun mester warda cu nan ainda.
Gobierno a acerca Fondo Monetario Internacional (IMF), pa asina IMF yuda cu e definicion di e normanan nobo. Aruba tin un surplus financiero y ta cumpli cu e normanan exigi, mustrando madurez financiero. Esaki ta motibo pa re-defini e normanan actual, cu ta basa riba e ley di LAft cu a bin na aña 2015, pa percura pa Aruba sali for di deficit.
A palabra cu prome cu 1 di mei 2025, lo presenta e Rijkswet nobo na Parlamento di Aruba y di Hulanda. Si logra cu e Rijkswet, e interes riba e prestamo durante di e Pandemia di Covid19, lo baha te na 3.2%.