Gobernador ta ricibi Minister di Asuntonan Economico y Clima
ORANJESTAD - Gobernador di Aruba, Su Excelencia Alfonso Boekhoudt, a ricibi riba dialuna 2 di november ultimo Minister Heleen Herbert di Asuntonan Economico y Clima pa un bishita di introduccion.
E minister ta bishitando e siman aki e partinan Caribense di Reino den cuadro di un bishita di trabou. Durante su bishita, e minister a reuni cu representantenan di gobierno y di sector comercial tocante e manera pa stimula e crecemento economico.
Den e combersacion entre Gobernador y e minister a papia, entre otro, riba e sosten cu Hulanda ta brinda pa realisa e transicion pa energia sostenibel na Aruba y riba e establecimento di e Plataforma di Crecemento Economico Caribense (EGC).
Sr. Hamza Kacha (Programmamanager di e parti Caribense di Reino), Sra. Irene Uitermark (Director di Regio y Ruimte), y Sr. Gerbert Kunst (Representante di Hulanda na Aruba, Curaçao, y Sint Maarten, VNACS) a acompaña Minister Herbert durante su bishita cerca Gobernador.
Despues di su bishita na Aruba, e lo continua cu su biahe pa Corsou y Boneiro.
Potretnan: © Kabinet Gouverneur Aruba