Gobernador ta ricibi e Lider di Team y Neuropedagogia y e Secretaria di Hunta Directiva di F.S.P.P.A.
ORANJESTAD - Diabierna 29 di augustus ultimo, Gobernador di Aruba, S.E. Alfonso Boekhoudt, a ricibi pa un audiencia Sr. Carlos Falla, Lider di Team y Neuropedagogo na Fundacion Siñami Paso pa Paso Aruba (F.S.P.P.A.) y Dr. Tiara Calvo, Secretaria di Directiva di F.S.P.P.A., cu ta alabes dokter y decano di asuntonan di studiante na American University School of Medicine Aruba.
E motibo di audiencia tabata e presentacion di e prome ehemplar di e di dos edicion di e buki: E Flor di Balornan “Un Tesoro pa mi bida” 2025. Diferente companianan y organisacionnan na Aruba ta sostene publicacion di e buki aki.
Lo uza e entrada cu lo genera pa sigui cu e proyecto di traimerdia di F.S.P.P.A., cu ta ofrece sosten profesional riba tereno di psicologia, logopedia, y neuropedagogia na un grupo vulnerabel di mucha y hobennan cu limitacion intelectual leve (LVB) y nan famia.
Potretnan: © Kabinet Gouverneur Aruba