Gobernador a huramenta hues suplente di Corte Comun di Husticia
ORANJESTAD - Dialuna 2 maart ultimo, Gobernador, Su Excelencia Alfonso Boekhoudt, a huramenta señor mr. C.B.A. Coffie como hues suplente di Corte Comun di Husticia, cu cede na Aruba.
E ceremonia di huramentacion a tuma luga na Cas Ceremonial di Gobernador, den presencia di, entre otro e Vice-President di Corte Comun di Husticia, Sra. mr. Jane Jansen.
Corte Comun di Husticia di Aruba, Corsou, St. Maarten y di Bonaire, Sint Eustatius y Saba ta percura pa hurisdiccion den prome instancia y den apelacion (hoger beroep) na e islanan. Corte di Prome Instancia na Aruba tin cede na Aruba y e audiencianan tambe ta tuma luga eynan. E miembronan di Corte Comun di Husticia ta trata, casonan civil, casonan penal y casonan di maneho administrativo hudicial (cu ta inclui casonan fiscal) tanto den prome instancia como den apelacion.
Potret: © Kabinet Gouverneur Aruba
