Fundacion Chico Harms un biaha mas cu un Parada Folklore Cultural exitoso
ORANJESTAD - Diadomingo 1 di september 2024, den conexion cu dia di Brazil, Fundacion Chico Harms a organisa un biaha mas e famoso Parada Folklore Cultural 2024 den e bario di Brazil.
Un parada cu a conta cu un total di 11 grupo di baile, luciendo trahenan folklorico sumamente colorido y bunita.
Parada Folklore Cultura ta importante pa mantene nos cultura na bida, y por admira con, cu hopi orguyo, Aruba a celebra su cultura. Tin varios evento cultural durante aña, pero esaki ta esun "original" mes, pasobra bo por wak con e participantenan yen di smaak y zjeito ta bin forma parti di e parada pa baila y celebra. Tabata obvio cu pueblo a gosa un mundo durante e parada cultural y a biba nos cultura grandemente.
Fundacion Chico Harms un biaha mas a luci cu nan dedicacion y esfuerso den mantene nos cultura bibo den cual a trece nos comunidad hunto pa celebra locual ta di nos.
Prome Minister Evelyn Wever-Croes a expresa di ta sumamente contento di por ta presente na un evento cultural asina importante y ta gradici Fundacion Chico Harms pa nan dedicacion y esfuerso den mantene nos cultura bibo.