Foro di Pago Nacional cu tema “FinTech” ta stimula innovacion, inclusion y stabilidad financiero

Vision di gobierno ta pa Aruba  bira un centro financiero digital regional, haciendo uzo di su sector bancario robusto pa crea oportunidad di empleo nobo di nivel halto y mitiga riesgonan manera “brain drain”. E meta ta pa modernisa e sector financiero y pa ofrece servicionan mas eficiente, accesibel y facil pa uza pa henter e comunidad.

Pa por transforma e vision aki den un Plan di Implementacion di FinTech concreto, Ministerio di Finansa, Asunto Economico y Sector Primario a encarga un studio exploratorio extenso door di e Comision Economico di Nacionnan Uni pa America Latino y Caribe (UN-ECLAC) na 2025. E investigacion a inclui misionnan di alto nivel pa acumula informacion y consultacionnan extenso cu stakeholdernan, marcando e ambiente regulatorio actual di Aruba y identificando oportunidadnan y riesgonan specifico. E estudio a compara e infrastructura di Aruba cu benchmarknan internacional, incluyendo paisnan di OECD y Small Island Developing States (SIDS), dunando un bista cla di e areanan cu mester mehora pa por crea un ecosistema di FinTech dinamico y robusto.

E resultadonan di e studio di UN-ECLAC ta sirbi como e base pa desaroya e Plan di Implementacion di FinTech. E desaroyo di e plan di implementacion di FinTech ta parti tambe di ecolaboracion estrecho cu Hulanda via e Landspakket Aruba. Hulanda via e Landspakket Aruba lo financia e desaroyo di e Plan di Implementacion di FinTech. Actualmente tin un proceso di destaho publico andando.

Paralelo na e esfuersonan legislativo, Banco Central di Aruba (CBA) ta hungando un rol crucial den preparacion di e mercado local door di organisa e Foro di Pago Nacional (FPN) cu e tema FinTech. Estableci como un plataforma permanente di consulta, e FPN ta reuni stakeholdernan publico y priva,   for di companianan di utilidad te cu e sector bancario, pa sigura cu e panorama di pago di Aruba ta sigur, confiabel y accesibel. Minister di Finansa, Asunto Economico y Sector Primario Geoffrey  Wever a accentua cu promove inclusion financiero no ta solamente un meta social, sino un necesidad economico vital. Door di mehora comportamento financiero y preveni debe excesivo, e iniciativanan aki ta fortalece e poder di compra di e comunidad y e salud financiero general di e nacion.

FinTech ta sirbi como un via pa relevancia global y diversificacion economico. teniendo cuenta cu recomendacion di UN-ECLAC, incluyendo e creacion di un sandbox regulatorio, Aruba ta creando e infrastructura necesario pa sectornan nobo impulsa pa tecnologia. Esaki ta resulta directamente den oportunidadnan di trabou nobo di nivel halto pa e forsa laboral local, reduci dependencia riba un solo sector economico y construi un base firme pa futuro.

Mientras cu digitalisacion ta acelera, e CBA ta tuma un postura proactivo pa educa y dialoga cu partnernan di sector publico y sector priva pa cuminsa encamina e proceso pa implementacion di e tecnologia. Trahando hunto ta e unico maner pa logra haci e vision bira realidad.

Durante e ultimo Foro di Pago Nacional (FPN), organisa door di Banco Central di Aruba (CBA), cu a tuma luga dia 4 di juni 2026, e topico di e sesion di e Working Group meeting tabata "FinTechs na Aruba." E sesion a inclui un discusion cu panelistanan representando Sentoo, CxPay y Pay.aw, kendenan a elabora riba e rol di FinTechs den e ecosistema di pago di Aruba. Ademas, CBA a brinda dos presentacion, titula "Kico ta FinTech?" y "Ambiente Regulatorio di FinTech." Adicionalmente, un representante di Departamento di Asunto Economico, Comercio y Industria di Aruba a duna un presentacion titula "Landspakket - Plan di Implementacion di FinTech." E mainta a conclui cu un discusion den grupo caminda a  discuti e riesgonan, desafionan y recomendacionnan pa crecemento di e sector FinTech cu tur stakeholder di e FPN.

“Door di e colaboracion continuo di e Working Group di FPN, Aruba ta riba bon caminda pa logra un infrastructura di pago di nivel internacional,” Minister Wever a comenta.