Firmamento acuerdo pa sigui fortalece colaboracion entre islanan Caribense y Hulanda den enseñansa y cultura
ORANJESTAD – Minister di Relacionnan den Reino, Educacion, Hubentud, Innovacion y Deporte, mr. Gerlien Croes, a firma un acuerdo di continuacion di colaboracion entre nos islanan Caribense y Hulanda riba tereno di enseñansa y cultura, den cuadro di e encuentro di e Vierlandenoverleg na Boneiro.
E acuerdo ta confirma e compromiso continuo pa sigui traha man den man riba proyecto y programa cu ta contribui na desaroyo educativo y cultural den Reino Hulandes.
Entrenan, e puntonan principal cu a wordo trata ta:
- Continuacion di proyecto Kibrahacha, pa profesionalisa y fortalece e formacion di nos docentenan;
- Intercambio di ideanan y strategia pa atrae nos studiantenan bek na nos islanan despues di nan estudio den exterior;
- Colaboracion den area di opleidingnan den zorg, pa sigui amplia e capacidad y conocemento den sector di cuido;
- Continuacion di programa “Nederlands als vreemde taal” den nos scolnan, pa fortalece competencia linguistico;
- Continuacion di e Strategic Education Alliance;
- Y sosten continuo via Cultuurfonds y Cultuureducatie, pa promove arte y identidad cultural.
Minister Croes a enfatisa cu e encuentro a sirbi pa reenforsa laso di cooperacion cu ta fundamental pa progreso comun:
“Nos ta comparti un meta comun: un sistema educativo y cultural cu ta inclusivo, sostenibel y adapta na necesidad di nos hobennan y comunidad. E colaboracion aki ta pone base pa un futuro cu mas oportunidad pa crecemento y conexion entre nos islanan y Hulanda”.
E reunion di Vierlandenoverleg ta sigui un tradicion di dialogo constructivo, transparencia y union den Reino Hulandes, unda e enfoke ta keda riba progreso pa tur ciudadano — tanto den educacion como den cultura.
