Extension di “BeYourOwnBoss” un programa educativo pa e scolnan secundario (MAVO y HAVO)

Ta doño di bo propio compania tambe por ta opcion di un profesion, pero mas importante, habilidadnan y mentalidad empresarial ta mas esencial no unicamente pa esnan cu tin aspiracion di ta nan propio hefe, sino tambe pa esnan cu ta desea pa traha den cualkier tipo di organisacion. E programa educativo “BeYourOwnBoss” ta ofrece e studiantenan un oportunidad pa adkiri habilidadnan cu nan lo por uza den cualkier ramo profesional cu nan scoge den futuro.

Cu e firmamento di e Letter of Intent (LoI), Aruba Airport Authority N.V. ta formalisa su compromiso pa sponsor continuidad di e programa educativo “BeYourOwnBoss” pa ocho scol secundario (MAVO y HAVO). E scolnan participante ta: Commandant Generaal Abraham de Veer, Colegio San Antonio, De Schakel College (MAVO y HAVO), Educampus Aruba, Filomena College, Maria College, y Colegio Nigel Matthew (HAVO).

E programa educativo lo inicia oficialmente na cuminsamento di e aña escolar 2025-2026 y lo conclui na mei 2026, na fin di e aña escolar cu un “Pitch Event”. Durante e programa, e studiantenan lo tin e oportunidad pa topa cu diferente empresario local, kende lo comparti nan experiencianan personal y conocemento di e mercado di Aruba. Adicionalmente, e studiantenan lo traha riba tareanan practico practico, incluyendo un encuesta di mercado, pa yuda nan compronde e necesidadnan y e oportunidadnan real den nos comunidad. Na final, tur studiante lo tin e oportunidad pa presenta nan idea di producto of servicio innovativo durante e evento final.

Nos ta extende palabra di gratitud na tur ocho scol, nan directornan y docentenan, y ta desea nan hopi exito cu e programa aki y e aña escolar venidero 2025-2026.

Un danki special ta bay na Aruba Aruba Airport Authority N.V. pa sponsor e proyecto aki y pa nan cooperacion valioso, cu lo tin un impacto positivo riba e studiantenan y nan preparacion pa un futuro exitoso.

“Aruba Airport Authority N.V. ta orguyoso di por sostene e programa “BeYourOwnBoss” como parti di nos compromiso cu empoderacion y innovacion di hubentud na Aruba. Door di curasha e studiantenan pa explora e retonan di mundo real, nos tin como meta pa lanta pensamento creativo y inspira nan pa un dia contribui na e industria di aviacion, sea pa medio di un carera na aeropuerto of door di desaroya productonan y servicionan innovativo cu ta forma su futuro.” 
-  Barbara Brown, Chief Revenue Development & Communications Officer na Aruba Airport Authority N.V.

“Na Qredits Aruba, nos ta mira empresario como mas cu djis cuminsa cu un negoshi, e ta mas bien tocante construi confiansa, soluciona problema y pensa creativamente. E programa “BeYourOwnBoss” ta trece e studiantenan mas cerca di e realidadnan di empresario, mientras cu ta mustra nan tambe con nan ideanan por impacta nos comunidad positivamente. Door di ekipa e hobennan cu e habilidadnan aki trempan den nan bida, nos ta duna nan e fundeshi pa triunfa den cualkier carera cu nan scoge y nos ta inspira nan pa soña, crea y lidera. Door di inverti den e hobennan di awendia, nos ta yuda pa forma e innovadonan y lidernan di mañan.” 
- Nathaly Harms, Branch Manager di Qredits Aruba.

Qredits Aruba ta bon conoci den sector empresarial pa sostene empresarionan cu microfinanciamento di te cu Afl. 200.000,- pa cuminsa y crece nan propio negoshi. Qredits Aruba tambe ta sostene empresarionan pa medio di coaching, recurso y programanan educativo.