Exposicion ‘Revival” di Pernile Tromp

Pernile ta un mucha muhe hoben, cu un talento increibel den pintamento. Desde un edad hopi jong, Pernile a manifesta un talento den arte y cu apoyo di su mayornan el a desaroya esaki na un forma impresionante.

E artista a expone su piesanan di arte den varios tecnica cu e ta domina. Un cu sigur a resalta ta e “charcoal drawing” unda el a ilustra varios portret di personanan famoso y tambe otronan di su propio inspiracion. E talento di Pernile ta di tal magnitud cu observando su arte, bo por confundi esaki cu un potret, cual ta indica bo su habilidad, capacidad y precision den pintamento.

Arte ta un actividad poderoso y tin un beneficio grandi pa e desaroyo di un hoben. Sea cu ta trata di dibuho, pintura, escultura of cualkier otro forma di expresion creativo, arte tin e capacidad pa laga e hoben explora y expresa su emocionnan.

Prome Minister Evelyn Wever-Croes a atende e exposicion y a expresa:“Semper mi lo sigui sostene artistanan local y sigur e hobennan artista di Aruba. Pernile ta un ehempel cu ora mayornnan sostene nan yiu, inverti den nan talento, e hoben por logra kico cu su curason ta bisa, y si ta den arte, esaki lo ta hopi bunita,”  

Por sigui Pernile Tromp’s Art riba su pagina di Facebook.