Exposicion “Letra y Consenshi: Balor Humano di un Pueblo”

E exposicion ta invita comunidad pa reflexiona riba historia di sclavitud na Aruba y e balor di dignidad humano, precisamente na bispo di Dia Nacional di Conmemoracion pa Abolicion di Sclavitud.

E ceremonia a encera:

• Palabra di bonbini di Ichmarah Kock di Biblioteca Nacional Aruba:
• un mensahe di directora Astrid Britten; 
• discurso di Prome Minister Mike Eman;  
• presentacion poetico di Tasho the Poet;
• presentacion di Marushka Tromp tocante UNESCO Memory of the World; 
• un mensahe graba di Memory of the World Nederland;
• un presentacion di Raymond Hernandez kende ta director di Archivo Nacional Aruba tocante e documentonan relaciona cu sclavitud;
• un dramatisacion artistico;
• palabra di Jefka Alberto cu a representa e Comite di Conmemoracion Pasado di Sclavitud;
• un introduccion oficial di e exposicion door di Renwick Heronimo.

Den su discurso, Prome Minister Eman a destaca cu ta importante pa comunidad mira e periodo di sclavitud, reconoce e hechonan cu a tuma luga y acepta cu tabatin un epoca den cual humanidad no tabata trata tur hende cu igualdad y dignidad.

El a señala cu solamente ora nos ta dispuesto pa reconoce e pasado, nos por sigui corigi loke a sosode y traha pa evita cu circunstancianan similar no ripiti nunca mas. Den e contexto ey, el a menciona tambe e disculpa oficial cu anteriormente a expresa na nomber di Reino Hulandes y a indica cu cada generacion tin responsabilidad pa carga e balornan di respeto, igualdad y dignidad humano.

Durante su discurso, el a enfatisa cu e historia di sclavitud no ta solamente trata di pasado, sino tambe di e responsabilidad continuo pa proteha e balornan cu ta sostene nos sociedad. El a señala cu e conflictonan y e gueranan cu mundo ta enfrenta awe ta recorda con civilisacion ta fragil y con rapidamente humanidad por perde e balornan di respeto y dignidad si nan no ta cuida.

Un di e documentonan central di e exposicion ta e asina yama “Carta Capriles”, un carta scirbi na 1857 door di Juan Bautista Capriles y otro ciudadano Arubiano, den cual nan a informa e Gezaghebber di e tempo tocante maltrato contra e personanan sclavisa. E documento ta mustra cu ainda prome cu emancipacion na 1863 tabatin e hendenan na Aruba cu a hisa nan bos pa defende dignidad humano.

E Carta Capriles ta forma parti di e coleccion di documentonan historico cu na 2025 a inscribi den UNESCO su Registro Memoria di Mundo, reconociendo nan importancia pa patrimonio documental mundial.

Na final di su discurso, Prome Minister Eman a expresa su aprecio na Archivo Nacional Aruba, Biblioteca Nacional Aruba, UNESCO y tur e expertonan cu durante hopi aña a dedica nan mes na investiga, preserva y digitalisa e documentonan historico aki. El a destaca cu nan esfuerso ta sigura cu e historia di Aruba keda accesibel pa futuro generacion y cu conocemento ta un instrumento importante pa evita cu e paginanan scur di historia no ripiti nunca mas.