Entrega di e prome prestamo facilita bou di BMKB-ACS, den colaboracion cu Qredits.

Minister di Finansa, Asuntonan Economico y Sector Primario, mr. Geoffrey Wever, hunto cu Staatssecretaris di Relacionnan den Reino y Gobernacion Efectivo, Eric van der Burg, tabata presente na e momento historico aki. 

Kico ta BMKB-ACS? 

BMKB-ACS ta para pa Borgstelling MKB-kredieten Aruba, Curaçao en Sint Maarten. BMKB-ACS ta un programa cu ta yuda companianan cu tin bon plannan, pero cu no semper tin suficiente garantia, pa haya un prestamo cerca banco of institucion financiero. Gobierno Hulandes ta cubri parti di e riesgo, pa e instituto financiero por presta e compania placa den un manera mas facil.

E bishita y entrega di e cheque na Vaper Trading ta marca un paso concreto den e compromiso di Gobierno pa haci financiamiento mas accesibel pa companianan local, cu hopi biaha ta topa obstaculo pa haya credito via banconan tradicional.

Apoyo pa crecemento di companía local

Vaper Trading VBA, ta un compania estableci na 2021, ta activo como wholesaler di productonan pa vehiculo, producto frozen y mercancia seco. Cu e financiamiento aki, e compania lo por sigui crece, amplia nan operacionnan y contribui mas ainda na economia local.

Durante e momento, Ministro Wever a enfatisa cu acceso na financiamiento ta uno di e pilarnan clave pa stimula entrepeneurship y diversificacion economico:

“Nos entrepeneurs local tin e vision y e determinacion, pero hopi biaha e acceso na capital ta e barrera di mas difical. Cu instrumentonan manera e BMKB-ACS, nos ta kita un parti di e riesgo, pa asina banconan y institucionnan financiero por sostene mas iniciativanan local cu potencial real.”

Colaboracion BMKB-ACS y Qredits

E programa BMKB-ACS, adapta pa contexto di Caribe Hulandes, ta ofrece un garantia entre 45% te 67.5% riba prestamonan, loke ta reduci e riesgo pa financiadornan y facilita acceso pa empresanan cu no tin suficiente colateral. 

Qredits, cu desde 2017 ta activo na Aruba, ta hunga un rol esencial den e ecosistema di emprendemento, no solamente door di financiamiento, como tambe coaching y guia empresarial. Te awor, nan a facilita 574 prestamo, representando un total di mas cu AWG 12.2 miyon, cu e meta di yega na e prestamo number 600 den 2026.

Ministro Wever a destaca e importancia di colaboracion entre sector publico y sector priva, enfatisando cu trahando hunto nos por logra pasonan concreto pa e economia di nos pais.

“Esaki ta un ehempel claro di con colaboracion entre gobierno, institucionnan financiero y entrepeneurs por crea impacto tangibel. Nos ta traha pa un economia unda iniciativa privado wordo stimula, sosteni y facilita, pa asina crea mas trabou, mas actividad economico y mas oportunidad pa nos pueblo.”

Minister Wever kier gradici Staatssecretaris Eric van der Burg pa su presencia y sosten, como tambe Qredits, cu nan apoyo pa e entrepreneurs, y felicita Vaper trading cu e paso importante aki.