Entrega di certificadonan di capacitacion huridico
ORANJESTAD – Riba 5 di februari Directie Wetgeving en Juridische Zaken (DWJZ) a tene un ceremonia oficial na John F. Kennedy Education Center pa otorga certificado na 20 hurista den servicio di Gobierno di Aruba.
E ceremonia a marca e clausura di un curso intensivo di tres dia duna pa prof. mr. Martijn Scheltema, den cual e participantenan a profundisa nan conocemento riba e tema di Overheidsprivaatrecht. E curso ta parti di e esfuersonan continuo di DWJZ pa fortifica e base huridico y profesional di e participantenan.
Hunto cu Director di DWJZ, mr. George Croes, Minister di Husticia, mr. drs. Arthur Dowers a haci entrega di certificado na cada un di e cursistanan, y a expresa su aprecio pa e dedicacion y compromiso mustra durante e trayecto di capacitacion.
Cu iniciativanan manera esaki, Gobierno di Aruba ta sigui inverti den desaroyo di capital humano, cu e meta di garantisa un servicio publico mas fuerte, profesional y bon prepara.