Economia di Aruba a crece den e prome kwartaal 2024
ORANJESTAD - Ministerio di Asunto Economico, Comunicacion y Desaroyo Sostenibel, recientemente a anuncia cu e economia di Aruba ta sigui mustra un crecemento positivo segun e ultimo publicacion “State of The Economy 2024 Q1” di Banco Central di Aruba.
Den e prome tres lunanan di 2024, indicadornan pa consumo manera importacion di mercancia y consumo di utilidad, a mustra un crecemento compara cu e mesun periodo di 2023. Indicadornan pa inversion ta mustra un crecemento den balor di hipoteca nobo pa cas, mientras indicadornan manera importacion di metalnan basico y trabounan deriva, materialnan di construccion y hipoteca comercial nobo ta mustra un caida.
Banco Central di Aruba ta indica cu den e prome lunanan di 2024 Aruba su economia a crece cu 11,2 porciento den termino real. E crecemento aki ta e resultado di e desaroyo positivo den e industria turistico y inversionnan relata na esaki.
Pa maart 2024 e inflacion tawata 2,1%, mientras e inflacion midi riba un promedio anual a sigui baha danki na e caida den contribucion di e aumento den tarifa pa utilidad den augustus 2022, prijsnan di gasolin y diesel mas abou, y normalisacion den prijsnan pa cuminda. Pa 2024 Banco Central di Aruba ta proyecta un inflacion di 1,6%.
E prome lunanan di 2024 ta mustra un tendencia positivo di nos economia cual ta den linea cu e proyeccion di Banco Central di Aruba, Departamento di Asunto Economico y Fondo Monetario Internacional.
