E di shete edicion di Aruba Art Fair ‘Un celebracion di arte y cultura’
ORANJESTAD - Aruba Tourism Authority (A.T.A.) ta mira bek na un fin di siman grandi pa loke ta trata arte, creatividad y cultura na Aruba.
Un biaha mas por a mira e ciudad di San Nicolas transforma y bira e punto central pa tur amante di arte na Aruba.
E aña aki, Aruba Art Fair a presenta obranan di arte impresionante di mas di dos shen artista, tanto local como internacional. Tur ta artistanan cu a desplega talento y creatividad excepcional pa eleva y haci San Nicolas como e centro di arte riba nivel internacional, y como un experiencia cultural unico y memorabel.
A.T.A. ta un partner importante pa Aruba Art Fair, un relacion cu ta existi for di inicio di e evento aki. E promocion di arte y cultura ta hopi importante pa A.T.A., y Aruba Art Fair ta un di e eventonan cu ta duna e plataforma perfecto pa logra esaki. Desde 2017, Aruba Art Fair a sigui crece y bira un evento caminda por experiencia diferente presentacion bibo, arte contemporanio, workshop educativo, y diferente proyecto cu enfoke na haci arte mas accesibel. Aruba Art Fair, a pone San Nicolas riba mapa como e capital di arte di Caribe y ta keda un atraccion atractivo.
Artenan mural, cu ta visibel y accesibel durante aña, seguramente lo sigui fungi como ‘Photo Moments’ pa tanto e local como tambe e bishitante. Esaki lo yuda promove arte como un parti integral di nos comunidad y experiencia turistico.
A.T.A. ta comprometi pa sigui sostene e tipo di iniciativanan cu ta duna realse na e desaroyo artistico y cultural di nos isla.