DVG ta monitor situacion di Hantavirus na Venezuela
ORANJESTAD - Directie Volksgezondheid (DVG) a tuma nota di e noticia internacional tocante fayecimento di tres persona den estado Anzoátegui na Venezuela, despues cu autoridadnan oficial di salubridad di e pais a confirma cu e personanan aki tabata infecta cu Hantavirus.
Abase di informacionnan colecta, actualmente e situacion na Venezuela no ta representa un riesgo directo pa Aruba.
Hantavirus ta den mayoria casonan un zoonosis, un enfermedad transmiti di animal pa hende, principalmente door di contacto cu orina, feces (pupu) of saliva di cierto tipo di raton silvestre (di mondi) y otro animalnan portador di e virus. Segun informacion oficial, no tin evidencia cu e casonan actual na Venezuela ta encera transmision di hende pa hende.
Na Aruba no tin animalnan portador di Hantavirus. Pa e motibo aki ta considera e posibilidad di transmision local hopi abou.
DVG ta sigui monitor e situacion di cerca y si evaluacion di riesgo cambia pa Aruba, lo tuma medidanan necesario pa proteha salud publico y informa comunidad debidamente.
Bo Salud, Nos Prioridad
Pa mas informacion, like Facebook page Directie Volksgezondheid DVG Aruba, follow riba Instagram directie_volksgezondheid_aruba, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw.
