DVG ta introduci proyecto piloto ‘Viruskenner' na Colegio Mon Plaisir
ORANJESTAD - Recientemente, Claire Faith Fransman, candidata pa PhD, actualmente trahando na Directie Volksgezondheid (DVG), a organisa e prome encuentro di e proyecto piloto ‘Viruskenner’ na Colegio Mon Plaisir.
Durante e encuentro aki, alumnonan di klas V3, V4 y V5 a ricibi un charla educativo di prof. dr. Eric van Gorp, di Erasmus MC na Hulanda.
E meta di Viruskenner ta pa amplia conocemento di hobennan tocante virus, e malesanan cu nan por causa, e diferente formanan di transmision y e importancia di prevencion.
Durante e charla interactivo, a dedica atencion na malesanan causa pa virus cu tambe ta presenta na Aruba, manera dengue, chikungunya y influenza. E alumnonan a siña con virus por plama, entre otro di persona pa persona y via insecto of animal pa hende, y cua medida nan mes por tuma pa preveni contagio.
Como clausura di e programa, e alumnonan lo desaroya nan propio proyecto educativo, den cual nan lo aplica e conocemento adquiri di un manera creativo. Finalmente, lo selecta tres proyecto ganado entre e proyectonan entrega.
Cu e iniciativa aki, DVG kier aumenta conscientisacion entre hobennan y stimula nan pa contribui activamente na prevencion di malesanan infeccioso.
Otro scolnan cu tin interes pa participa den e proyecto Viruskenner por tuma contacto cu Claire Faith Fransman via e-mail c.fransman@erasmusmc.nl.
