DVG ta informa: Kico ta Sarampi? Con ta trat’e?
ORANJESTAD – E malesa yama, ‘Sarampi’ ta ocasiona pa un virus y no tin cura p’e. Ta e curpa mes mester combati e virus y esey ta tuma tempo. Kico e persona cu sarampi por haci?
- Busca conseho y instruccion cerca bo dokter di cas.
- Pa alivia/baha keintura por tuma por ehempel medicamento manera paracetamol, pone un paña cu awa maravilla riba e frenta y rond di e nek, of por baña cu awa poco friu.
- Pa preveni deshidratacion corda bebe hopi awa. No refresco. no juice. Nan ta contene hopi sucu.
- Pa alivia grawatamento, na botica por cumpra producto cu por hunta riba cuero.
Na momento cu e malesa desaroya den un infeccion bacterial, por ehempel pulmonia, infeccion di wowo of horea, dokter mester combati e bacteria cu antibiotica.
E miho manera pa preveni sarampi ta pa medio di vacunacion. E vacuna cu ta proteha contra e malesa di sarampi ta e vacuna MR ( Measels, Rubella) of e vacuna MMR (Measles, Mumps, Rubella). E vacuna ta riba mercado for di 1971 y ta sigur pa tanto mucha como adulto. Tene na cuenta cu vacuna ta un metodo di prevencion. E no ta un tratamento, tampoco un cura.
Pa mas informacion yama 522-4200 of manda un mail na servicio@dvg.aw of bishita nan website www.dvg.aw
