DVG ta enfatisa riba linea di maneho pa zonido durante temporada di Carnaval.

Un linea di maneho compila cu ayudo di diferente stakeholder. E linea di maneho aki ta duna conseho riba e topico di zonido den eventonan musical manera Carnaval y concierto, sea den espacio interior of exterior. Ta e meta cu e linea di maneho aki den futuro lo forma e base pa cu cumplimento di e ley “Hinderlijke geluidenverordening”.

Nos oido ta sumamente importante pa nos salud general y nos funcionamento diario. Hopi no ta realisa su importancia te ora cu nan cuminsa tuma nota di perdida di nan oido. E lamentabel ta cu unabez nos perde parti di nos oido, esaki nos no por recupera mas. P’esey ta importante pa nos proteha esaki ora nos tin e y si acaso tin hende a perde cierto parti di nan habilidad pa scucha bon, ta importante pa nos cuida loke nos a resta of tin ainda.

Tur aña di nobo durante temporada di Carnaval e topico aki ta bin na vigor. E pregunta cu ta haci continuamente ta; kico of cuanto ta un zonido responsabel cu ta contribui na conserva y perserva e oido di tanto participantenan como musiconan, espectadornan y esnan trahando durante e evento musical?

Maneho interior cera; pa cu e temporada di Carnaval e linea di maneho aki ta duna como conseho pa mantene zonido den un espacio interior cera te na un maximo di 90db midiendo esaki para entre e comienso di e scenario (stage) te cu mas leu unda publico por para. 

Maneho interior den aire liber, pa eventonan interior den aire liber (jump in) e conseho ta pa mantene e cantidad di zonido na un maximo di 100db te cu 12pm y despues di 12pm te na un maximo di 95db midiendo esaki para pafo na e ‘grens’ di e localidad. E diferencia den db cu ta cambia den cuadro di e orario ta relaciona cu e maneho di Hinderlijk geluidenverordening di 1998. 

Parada di Carnaval; pa locual ta e conseho cu DVG ta duna pa cu maneho di zonido durante parada di Carnaval esaki ta maximo 90db midiendo esaki para na un distancia di 10 meter for di e speakernan cu ta produci e zonido. 

Añanan anterior durante midimentonan di zonido cu a tuma lugar durante parada di Carnaval, DVG a midi cerca algun banda musical un maximo di 115db cu ta un zonido cu no solamente ta causa daña na oido di hende pero ta hasta desregula e latido di curason di un persona, ocasiona stress y iritacion.

E linea di maneho aki cu DVG a produci ta pa duna un guia na, entre otro, companianan di zonido y nan tecniconan pa contribui na salud di e oido di nos tur. 

Pa mas informacion riba e linea di maneho por consulta e documento ‘Richtlijn Hinderlijke Geluidsnormen voor Muziekevenementen’ 

Pa mas informacion:

• Like Facebook page Directie Volksgezondheid DVG Aruba;
• Follow Instagram directie_volksgezondheid_aruba;
• Consulta www.dvg.aw;
• Yama 5224200;
• E-mail servicio@dvg.aw.