DVG a participa activamente durante Caribbean Arbovirus Summit 2026 na Aruba
ORANJESTAD - Awe 19 november 2026a tuma luga e conferencia internacional Caribbean Arbovirus Summit 2026 & CARE-READY Kick-off na HOH Academy na Aruba.
E conferencia ta reuni specialistanan medico, profesionalnan di salud publico y expertonan di diferente isla di Caribe y Hulanda.
E proposito di e conferencia ta pa comparti conocemento y experiencia, fortalece cooperacion regional y mehora preparacion pa preveni, detecta y controla brotenan di malesanan infeccioso.
Durante e conferencia ta trata topiconan importante manera dengue, chikungunya, malesanan transmiti pa sangura, diagnostico, vigilancia epidemiologico, vacunacion y prevencion di malesanan respiratorio manera RSV.
Directie Volksgezondheid (DVG) a participa activamente den e conferencia cu dos presentador, Anselmo Mathew y Luis Chong.
Anselmo Mathew, beleidmedewerker di DVG hunto cu Radjin Steingrover, a brinda un presentacion riba arbovirus emergente, epidemiologia y metodonan di diagnostico.
Luis Chong hefe di GKMB a brinda un presentacion riba vigilancia epidemiologico di arbovirus, control di sangura y medidanan di prevencion pa proteha salud di comunidad.
Un otro parti importante di e conferencia ta e introduccion di CARE-READY, un iniciativa dirigi riba fortalecemento di vigilancia, investigacion y preparacion regional contra brotenan di malesanan infeccioso.
Pa Aruba, e intercambio di conocemento y experiencia aki ta importante, considerando cu malesanan manera dengue y chikungunya ta representa un riesgo continuo pa salud publico den nos region.
Cu su participacion, DVG ta contribui na intercambio di conocemento y fortalecemento di cooperacion regional, cu e meta comun di preveni malesa y proteha salud di nos comunidad.
