Dump na Parkietenbos awo ta conta cu dos incinerator nobo y moderno

Esaki den cuadro di e proyecto nobo di incinerator cu tin cu trece alivio specialmente pa e maneho di desperdicio medico cu no por djis bay riba e sero di desperdicio residencial/industrial cu tin na e dump, conoci como e “landfill”. 

E proyecto aki ta uno importante pa tanto e maneho di desperdicio, pero tambe pa mehora e situacion laboral pa e empleadonan. 

Pa hopi tempo, e espacio den cual tabata acumula desperdicio medico, tabata casi yega e dak, cual tabata crea un situacion alarmante pa no solamente esnan trahando eyden, sino pa e area di Simeon Antonio y bisindario. 

Cu e instalacion di dos incinerator nobo, por reduci e cantidad di desperdicio biologico/medico di manera eficiente y sin cu esaki tin impacto grandi riba medio ambiente. 

Ademas di e dos incinerator nobo cu a instala, pronto lo haya dos incinerator mobil nobo parti pafo cu lo yuda acelera e proceso y maneho di desperdicio medico.  

Mirando e situacion den cual e empleadonan tin cu traha, gerencia a crea un facilidad pa mehora e bienestar di e empleadonan. Actualmente cada empleado di dump, ta pasa henter dia trahando den un ambiento no higienico den nan coverall y ta bay cas cu e mesun paña bisti. Esaki obviamente no ta higienico, mirando cu nan ta sinta den nan auto personal y bay cas den e mesun coverall bisti cual por trece contaminacion di trabao den nan auto y hogar. E facilidad nobo ta un espacio den cual nan por cambia paña y hasta laba esakinan pa por tin esaki limpi pa e siguiente dia di trabao. Tambe a instala sistemanan specialmente pa laba man y desinfecta esaki, separa for di unda nan ta maneha cuminda.  

Segun Minister di Husticia y Energia mr. drs. Arthur Dowers, e retonnan tabata basta grandi na momento cu a tuma e cartera over y a gradici tur stakeholders, pero specialmente Serlimar, cu a sa di carga pasenshi y a pasa den momentonan dificil na caminda pa yega awe na e facilidad nobo aki. Esaki ta un logro grandi pa maneho di desperdicio medico y un paso firme den maneho eficiente y efectivo di desperdicio aki na Aruba. 

Gobierno ta consciente cu e planta aki no ta algo facil pa atende cu ne, mirando cu tin cu tene contacto continuo cu esnan cu ta biba den e bario. 

Na final di e discursonan e director di Utilities, Sr. Joseph Everon, a sorprende Sra. Zoey Cornijn di Fundacion Luna cu un donacion di tres mil florin. E donacion aki ta destina como muestra di aprecio pa e trabou incansabel di e fundacion cu cacho di caya, un problema cu ta surgi tambe rond di e sitio di dump di Parkietenbos.