DTI ta apela na comunidad pa pone siguridad prome durante Dia Nacional pa Cuida Aruba

Richella Dorothal, Director interino di DTI, ta enfatisa cu cada ciudadano por aporta na bienestar di Aruba, pero ta importante pa haci esaki di un manera sigur y responsabel. “Dia Nacional pa Cuida Aruba ta un actividad nacional y publico. Pesey, nos kier conscientisa tur participante pa tene cuenta cu e medidanan basico di siguridad y haci uso di e medionan di proteccion personal necesario,” Dorothal a expresa.

Proteccion personal durante limpieza

DTI ta conseha tur participante pa haci uzo di Personal Protective Equipment, conoci como PPE. Esakinan ta medio di proteccion personal cu ta yuda preveni accidente y lesion durante trabou.

DTI ta recomenda:

• Bisti sapato adecuado: No haci trabou di limpieza cu slof. Bisti un sapato cera y adecuado, preferiblemente safety shoes, pa proteha pia contra obheto skerpi, sushi pisa y otro material peligroso. 
• Proteha contra solo: Bisti un petchi of otro proteccion contra solo, particularmente ora ta traha pa largo rato den solo.
• Uza handschoen adecuado: Esaki ta particularmente importante ora ta recohe of move palo, glas, metal y otro obheto cu por corta of causa herida.
• Uza bril di siguridad: Bisti esaki ora e tipo di trabou of material cu ta manipula por forma un riesgo pa wowo.
• Tene cuenta cu glas y otro material skerpi: No mester pone glas kibra y otro obheto skerpi den un saco di sushi. E material por corta y kibra e saco y causa herida na e persona cu ta carga of procesa e sushi. Pone glas y otro obheto skerpi den un caha of recipiente duro cu no ta kibra facilmente. Si un saco ta contene material peligroso, ta importante pa avisa e persona cu lo atende cu ne, pa e sa kico tin aden y por manipul’e cu debido cuidado.

Proteccion contra calor y solo

Dia Nacional pa Cuida Aruba ta tuma luga den condicionnan di hopi calor. DTI ta recorda tur participante pa:

• Haci uzo di sunblock.
• Proteha nan mes contra solo.
• Hidrata bon durante henter e actividad.
• Bebe suficiente awa y tuma descanso ora ta necesario.

Cuida muchanan cu ta yuda

Si muchanan ta participa den e actividadnan di limpieza, nan mester haci esaki bou di supervision di un adulto. Percura pa nan bisti handschoen y zapato sera, y no laga nan manipula glas, kimico of otro material peligroso. Ora di hala of move material pisa, wak bon rond di bo. Percura pa e material no cay riba nos muchanan, riba otro persona of riba nan pia. Mantene e camindanan pa cana liber y limpi pa preveni hende por cay y/of otro accidente.

Transportacion sigur di sushi

Personanan cu ta transporta sushi of material den un pickup of otro vehiculo mester mara y asegura e carga bon. Esaki ta preveni cu saco, palo of otro material cay riba caminda, causa accidente of haci daño na vehiculo di otro ciudadano.

Kimico of substancia desconoci

Si durante limpieza bo encontra kimico, un recipiente cu substancia desconoci of cualkier otro material cu bo no ta reconoce, no manipula asbestos sin tene e debido precaucion. Nunca asumi cu un hemchi, bleki of otro recipiente ta sigur pa mishi cune e por contene un producto cu tin kimico. E contenido por ta peligroso, aunke e recipiente no tin un label. Mesterelimina e material di un manera responsabel.

Profesional mester atende cu asbestos    

DTI ta haci un apelacion special pa tene cuenta cu material cu por contene asbestos. No kita, kibra ni transporta asbestos pa bo mes. E material aki por forma un riesgo serio pa salud y   solamente  persona y compania reconoci cu tin e conocemento y medio adecuado por deshaci di dje di un manera sigur. Si un ciudadano sospecha cu el a encontra asbestos, e mester stop cu e trabou, aleha otro persona for di e sitio y tuma contacto cu DTI pa orientacion.

Reporta situacionnan peligroso

Pa reporta un situacion peligroso, substancia desconoci, asbestos of un otro caso cu ta rekeri atencion di DTI, comunidad por yama e number di emergencia di DTI na 593-7922

Gobierno di Aruba hunto cu DTI ta desea tur ciudadano un Dia Nacional pa Cuida Aruba productivo y sigur. Manteniendo nos isla limpi ta responsabilidad di nos tur, pero mester  ehecuta cada actividad cu debido cuidado, proteccion y responsabilidad. Cuida Aruba, pero cuida bo mes y esnan rond di bo tambe.

Dia Nacional pa Cuida Aruba

Dia Nacional pa Cuida Aruba ta un iniciativa di Gobierno di Aruba cu ta busca fortalece responsabilidad comparti den cuido di nos isla. Bou di e lema “P’ami. P’abo. Pa nos tur.”, e campaña ta invita ciudadano, empresa, scol, club, fundacion y organisacion pa uni forsa durante un gran accion nacional di limpiesa riba diasabra 25 di juli. Ademas di limpia diferente area rond Aruba, e iniciativa tin como meta crea mas conscientisacion cu cuido di nos entorno ta responsabilidad di nos tur. Un Aruba limpi y bon cuida ta cuminsa cu compromiso y accion di cada ciudadano. Pa mas informacion subi https://arubatanostur.com/.