DNM su podcast “Cadushi ta Zona cu Dyrick” ta hopi educativo!
ORANJESTAD – Awe ta wak bek 2 luna pasa cu Directie Natuur en Milieu (DNM) a lansa serienan di podcast yama “Cadushi ta zona cu Dyrick”.
Dyrick Wouters un hoben dinamico cu pasion pa Aruba su cultura y naturalesa ta sinta y combersa cu diferente stakeholder den nos comunidad cu ta relaciona cu nos naturalesa.
Den den e prome episodio Dyrick a haya sa ken ta esnan encarga cu e departamento cu ta formula e maneho pa Aruba su naturalesa y medio ambiente. Pues ken y kico tur ta e tareanan di DNM. Den episodio 2, e hoben a combersa cu representante di Aruba Conservation Foundation (ACF) anteriormente Parke Arikok, sra. Natasha Silva y Departamento di Salud Publico sra. Jurette Croes tocante e relacion entre bo salud y naturalesa. Den episodio 3, a combersa cu nos mama di naturalesa, sra. Olinda Rasmijn cu pa añanan a encabesa StimAruba y Director di Museo Archeologico, sr. Pancho Geerman unda a combersa tocante nos herencia natural. Cada un edicion di e podcast aki ta yena cu informacion interesante cu ta capta bo atencion di comienso te final.
Riba diahuebs 8 di mei pa 7:00pm e di 4 episodio ta disponibel riba rednan social y bo plataforma di podcast preferi. Dyrick ta hiba un combersacion ameno cu sra. Ray-Anne Hernandez di UNESCO y sr. Gregory Fung-a-fat di 297Farms unda e pregunta, Dicon naturalesa ta un base pa desaroyo sostenibel? ta haya contesta.
E serie, “Cadushi ta zona cu Dyrick”, tin un acogida grandi bou di nos hobennan pero tambe nos adultonan mayor cu ta sigui e serie aki via e canal menciona y online. Hopi ta remarca cu e podcast aki ta uno hopi educativo unda esnan cu a waknan a siña hopi cos pero tambe con cada persona ta duna di su parti pa yuda conserva nos naturalesa y medio ambiente. E podcast ta capta bo atencion door di e curiosidad y pasion di Dyrick cu ta e presentador, explorando Aruba su biodiversidad, tradicion, esfuersonan di conservacion y retonan ambiental.
Pueblo di Aruba ta keda invita pa subscibi na e canalnan social di DNM pero tambe riba plataforma di podcast asina no perde ningun episodio di “Cadushi ta zona cu Dyrick”. Pronto e serie educativo aki lo ta riba Canal 23 di TeleAruba pues keda pendiente nos televidentenan. Nos kier a gradici Sra. Ray-Anne Hernandez di UNESCO y Sr. Gregory Fung-a-fat di 297Farms pa nan cooperacion y pa comparti nan experticio y conocemento.
