Directora di Bureau Sostenemi ta mustra riba e importancia pa scucha e muchanan

Desde 2019, Bureau Sostenemi ta e punto central, e asina yama Advies y Meldpunt (AMK), pa raporta maltrato di mucha. Durante un conferencia di prensa recien teni, sra. Magaly Maduro, Directora di Bureau Sostenemi, a expresa di ta sumamente contento cu a decreta april como luna contra abuso di mucha den cual lo enfoca mas riba e problematica aki.

Bureau Sostenemi ta mira solamente un parti chikito di e problema aki, principalmente e abuso emocional pero tambe e negligencia emocional cual ta un di e motibonan cu e muchanan ta bira vulnerabel pa abuso sexual. Segun cifranan di Bureau Sostenemi, pa aña tin alrededor di 400 caso pero no tur ta trata di maltrato of abuso sexual. Remarcabel ta cu dalmento di mucha ta pasa hopi na Aruba y ta considera como algo normal pa hopi.

Na 2023 Bureau Sostenemi a haya refuerso di dos trahado social, cual a alivia un poco nan trabou. Segun e directora, 99% di abuso sexual ta causa pa un hende hopi cerca di e mucha, y e mayornan di e mucha tin e obligacion y responsabilidad pa atende cu esaki.

Ta sumamente importante pa kere den e mucha. Ora un mucha bisabo cu e no kier frecuenta cierto persona, of e no kier pa cierto persona wak p’e of e no kier sinta den scochi di cierto persona, mester pone bon atencion na esaki, mester tende di e mucha y busca mas leu pa sa dicon.
No ta na Aruba so e cifra aki ta halto, sino rond  mundo. E speransa ta pa yega na baha e cifra halto di abuso di mucha na Aruba, y si cada persona na Aruba contribui y ‘pone su granito di arena’ nos por yuda combati e abuso di menor en general.

Pa denuncia un caso di abuso di mucha of pa conseho por yama gratis: 588 1010 of email: sostenemi@aruba.gov.aw.