Directie Luchtvaart ta informa riba e directiva emiti tratando Modificacion di Software di avion Airbus

E directiva aki ta instrui usuarionan di avionnan Airbus A320 pa reemplaza/modifica un pieza (“elevator aileron computer”) prome cu e siguiente vuelo. E computer aki ta controla e movemento di e nanishi (ariba/abou) y hala (ariba/abou) di e avion. Ta premira cu e directiva aki lo ta aplicabel pa un gran cantidad di e avionnan A320 den servicio mundialmente, y cu lo mester para tur avion afecta pa haci e modificacion.

“Airworthiness directive” y Siguridad 
Den mundo di aviacion emitiendo un directiva asina aki ta algo comun. Ta haci esaki pa mehora e siguridad di e tipo di avion concerni, basa riba e feedback operacional. Loke no ta hopi comun ta cu un cantidad grandi asina di avion ta afecta na mes un momento, manera ta e caso awor. Mester bisa cu e avionnan tipo Airbus 320, cu si ta keda bula, ta avionnan cu no ta afecta door di e directiva, of ta avionnan cu ta modifica caba segun e directiva. Tambe ta importante pa trece dilanti cu en general, e avion tipo Airbus A320 riba su mes ta un avion sigur cu un bon safety record.

Efecto pa Aruba
E avion tipo Airbus A320 ta un di e avionnan mas uza na mundo. Door cu e biaha aki un cantidad asina grandi di e tipo di avion aki ta afecta, esaki lo tin como consecuencia cu aerolineanan afecta lo haya nan mes ta cancela cierto vuelonan. Aruba lo no ta un excepcion, lo por spera cancelacion di algun vuelo pa Aruba door cu e tipo di avion Airbus A320 ta hopi uza pa vuelonan pa Aruba door di diferente aerolinea. Ta premira cu e situacion aki lo dura por lo menos un pa dos siman. Pa e motibo ey ta conseha pasaheronan di aerolineanan cu ta uza e tipo di avion aki pa keda den contacto cu nan aerolinea y tambe pa monitorea e website di nos aeropuerto.