Diabierna awo nos tur ta bay bek caya!
ORANJESTAD - Diamars anochi Gobierno di Aruba a anuncia cu e siguiente edicion di Ban Bek Caya lo tuma luga diabierna awo dia 27 di juni for di 5’or di atardi pa 10’or di anochi.
Mirando e exito rotundo di e prome Ban Bek Caya, cu a conta cu alrededor di 5 mil hende cu a sali bay haci compras y disfruta di e ambiente den Caya Grandi, Gobierno di Aruba, Departamento di Cultura y Aruba Tourism Authority, ta organisa e di dos edicion.
Mescos cu Ban Bek Caya #1, e biaha aki atrobe lo tin oferta special durante e shopping night. Ademas lo tin un variedad amplio di cuminda y entretenimento den Caya grandi, cuminsando na Plaza Daniel Leo te cu Djiespie’s Place.
Caya Grandi lo tin evento den tur skina:
- Renaissance Mall lo tin shopping night te 8’or;
- Plaza Daniel Leo lo tin DJ Devin, 1OAK, Nutzbeatz y Steve Andreas;
- Dufry lo tin DJ GOGO, Steve Andreas y Best of Yen;
- Plasa La Linda lo tin DJ SKY, Datapanik y ‘N Fuzion;
- Plasa Pro Fashion tin Kids Corner, Face Painting y un cantidad di cos dushi pa mucha;
- Plaza Cultural lo tin celebracion di Fiesta di Dera Gay;
- Plaza Nikki Habibe lo tin ambiente di Banda Nos cu Nos, DJ Edson, Eric Rafael;
- Plaza Comercio lo tin Benta di Producto local, Rincon Boys y DJ Splash.
Ademas lo tin 30 tent reparti strategicamente riba e ruta den Caya Grandi y 16 kiosko di productonan artesanal produci localmente.
Diabierna awo, Caya Betico Croes lo briya un bes mas cu e ambiente unico di Ban Bek Caya 2.0