Dia Mundial di Zoonosis 2026

E dia aki tin un nificacion historico, ya cu e ta conmemora e fecha na aña 1885 caminda e famoso cientifico Louis Pasteur a administra e prome vacuna cu exito contra rabia (rabies), un di e enfermedadnan zoonotico mas peligroso.

Kico ta Zoonosis 

Zoonosis ta e grupo di malesanan transmiti di bestia pa hende. Esaki por sosode via bacteria, virus, parasito of fungi. Segun datonan di e organismonan di salud (manera CDC y WHO), rond di 60% di tur malesa infectioso existente den hende, y 75% di esunnan nobo (manera tabata e caso cu COVID-19, dengue of ebola), tin nan origen den animal.
E aña aki, Departamento di Salud kier recorda comunidad cu pa proteha salud di hende, nos mester cuida salud di nos animalnan y di e medio ambiente tambe.

Conseho Practico pa Prevencion

Prevencion ta cuminsa na cas y den nos comunidad. Aki tin algun paso pa proteha y evita:

• Vacuna bo mascotanan: Mantene bo cacho y pushinan al dia cu nan vacunanan. Un mascota sano ta e prome liña di defensa pa bo famia.
• Laba bo man cu habon: Semper laba bo mannan bon cu awa y habon despues di hunga, duna cuminda of haci limpi e luga caminda e bestia ta biba.
• Higiena cu cuminda: Laba fruta y berdura bon. Sigura bo mes di cushina carni (specialmente di galiña y porco) na e temperatura corecto pa mata bacteria manera Salmonella of E. coli.
• Evita contacto cu animal salbahe: No mishi ni purba alimenta animalnan salbahe (manera macaco, cierto parha of insecto desconoci). Si un bestia ta mustra malo of comporta su mes straño, mantene distancia.
• Proteha bo mes contra sangura y carpata: Uza 'repelente' y haci inspeccion regular na bo mascotanan pa evita cu insectonan ta pasa enfermedad for di animal pa hende.

Preveni ta miho cu cura: Door di cuida e relacion cu nos tin cu e animalnan rond di nos, nos ta proteha e salud di henter nos comunidad.