Dia Mundial di Limpieza 2024. Make room for life!

E aña aki, ta e prome biaha cu WCD ta aparece den calendario internacional observa di Nacionnan Uni (UN). Tur aña, World Cleanup Day ta cay riba e tercer diasabra di e luna di september.

‘Let’s Do It World’, ta un-Nongovernmental organization y miembro acredita di e Programa di Medio Ambiente di Nacionnan Uni (UNEP), y di Asamblea di Medio Ambiente di Nacionnan Uni (UNEA). Na juli 2023, e Grupo di Metanan di Desaroyo Sostenibel (SDG) di Nacionnan Uni a reconoce ‘Let’s Do It World’ cu su premio di mobilisacion pa organisa Dia Mundial di Limpieza. Na december 2023, Nacionnan Uni a anuncia su ratificacion unanime di e resolucion y a declara 20 di september como Dia Mundial di Limpieza. Esaki ta yuda aporta na e importancia di e causa, unda cu hendenan rond mundo ta mas consciente di e tema di desperdicio y e vision di e organisacion. E aña aki tambe tin un tema mara na e dia observa, esaki ta ‘Make Room For Life!’ traha luga pa bida.

Directie Natuur en Milieu (DNM) ta refeleha riba e topico aki y por deduci cu un bon maneho di desperdicio no solamente ta necesario pero ta encera un accion di un y tur pa asina nos tin un Aruba limpi pa biba aden. Dia Mundial di Limpieza ta un di e maneranan pa inspira cambio social duradero den actitud di hende relaciona cu maneho di desperdicio general. Pa aña, humanidad ta genera biyones di tonelada di desperdicio solido. Sin accion e cantidad di desperdicio na mundo lo aumenta cu 70% na nivelnan actual pa 2050. Ademas, tin mas di 3.5 biyon di hende no tin acceso na sistemanan eficiente di maneho di desperdicio, hopi di e desperdicio ta incinera of ta bay den naturalesa, lama, y tambe den sistema di riunan na otro parti mundo.

Resultado di Dia Mundial di Limpieza 2023 a mira tres tendencia global importante cu a aumenta; participacion di hoben y studiante, gobierno y e cantidad grandi di e desperdicio colecta di 218,704 tonelada. Nos medio ambiente ta confronta contaminacion diario di material di desperdicio y ta menasa bida na mundo. E esencia di e tema di e aña aki ta pa elimina desperdicio pa traha espacio pa bida. Mester cambia e comportacion y custumber di hende pa cu consumo y desperdicio.

Si bo ta interesa di participa na Dia di Limpieza Mundial, tin un par di cos cu bo por haci:

• Tuma e decision pa cambia bo patronchi di consumo y reduci bo mesun cantidad di desperdicio cu bo ta genera. Con pa haci esaki? Nenga plastic di un solo uzo, incorpora e 5 R’nan ora di pensa di of adkeri un producto. E 5- R’ nan ta; ‘rethink, refuse, reduce, reuse y recycle’ productonan. Ora di recicla tambe pensa riba recicla productonan organico limpi tambe, pa asina traha bo mesun gordura di e resto di berdura y fruta curu y foyonan, etc.
• Organisa bo mes un evento di haci limpi. Forma un grupo di amigo y famia, scoge un area y haci esaki limpi. No corta mata sino solamente recoge sushi, sortia esaki y deshaci di esakinan na e localidad asigna na un manera responsabel.
• Sea un boluntario na momento cu tin un beach clean-up of area cleanup den bario. Tin hopi organisacion cu ta traha na bienestar di medio ambiente manera Turtugaruba, Scubblebubbles, Plastic Beach Party y mas.

Participando na e accion di Dia Limpieza Mundial, bo ta yuda trece conscientisacion di e reto importante aki y haci un diferencia den bo comunidad, naturalesa y medio ambiente. Bo esfuerso ta locual ta haci e diferencia pa duna bida un oportunidad y dune su luga.

DNM ta haci un yamada na e comunidad pa saca un potret of video di bo famia of grupo di amistad aportando na e causa di haci limpi y comparti’e riba e plataformanan social y tambe inclui e hashtagnan aki #worldcleanupday #worldcleanupday2024 #wastefreeworld #letsdoitworld