Dia Mundial di Hepatitis: Tuma Accion, Haci Test, Busca Tratamento!

E file aki ta den archivo.

ORANJESTAD - Tur aña riba 28 di juli, nos ta conmemora e Dia Mundial di Hepatitis pa concentra atencion riba hepatitis viral, cu ta un grupo di malesa infeccioso cu ta afecta hopi hende rond di mundo, causando malesa di higra agudo y cronico.

Hepatitis ta referi na e inflamacion di e higra. E higra ta un organo hopi importante cu ta haci diferente trabou den nos curpa, manera filtra e sanger, produci bilis pa e digestion, y yuda cu metabolismo di remedi y nutricion.
Ora e higra inflama, su funcionnan por keda stroba y esaki por causa diferente problema cu salud.

Kico ta causa hepatitis?

E causa mas comun di hepatitis ta un infeccion viral. Tin diferente tipo di virus di hepatitis, pero e mas comunnan ta:

  • Hepatitis A (HAV): Ta plama via cuminda of awa contamina cu e vírus;
  • Hepatitis B (HBV): Ta plama via sanger, likido di curpa of durante contacto sexual;
  • Hepatitis C (HCV): Ta plama principalmente via contacto di sanger cu sanger, manera ora ta comparti hangua;
  • Hepatitis D (HDV): E tipo aki ta afecta solamente esnan cu ya tin Hepatitis B;
  • Hepatitis E (HEV): Similar na Hepatitis A, e ta plama via cuminda of awa contamina.

Banda di virus, tambe por  causa hepatitis:

  • Uzo excesivo di alcohol;
  • Cierto remedi;
  • Malesanan di e sistema inmunologico;
  • Elementonan toxico.

Sintomanan di hepatitis:

Hopi biaha, specialmente den e fase trempan di hepatitis cronico, hende no tin sintoma. P'esey e ta yam’e "e asesino silencioso". Ora cu si tin sintoma, nan por inclui:

  • Cansancio extremo;
  • Gan'i saca y sacamento;
  • Dolor di bariga, specialmente na e parti superior drechi (caminda e higra ta);
  • Perdida di apetit;
  • Keintura leve;
  • Dolor di joint;
  • Orina scur;
  • Af di color no normal
  • Ictericia: Cuero y wowo ta bira geel.

E aña aki laga nos compromete nos mes na:

  • Siña e hechonan: Compronde con hepatitis ta wordo transmiti, su sintomanan y su impacto;
  • Haci test: Diagnostico trempan ta crucial pa un tratamento efectivo y pa preveni mas transmisión;
  • Busca tratamento: Tin tratamento efectivo cu por maneha y hasta cura hepatitis;
  • Aboga pa cambio: Duna sosten na esfuersonan pa aumenta acceso na prevension, checkmento y tratamento pa tur hende.
Dia Mundial di Hepatitis