Dia Mundial di Diabetes: Cambia bo slok, cambia bo habitonan!
ORANJESTAD - 14 di November ta conmemora Dia Mundial di Diabetes.
E fecha aki ta conmemora e nacemento di Sir Frederick Banting, kende hunto cu Charles Best a descubri insulina na 1922. E dia ta enfoca riba conscientisacion, prevencion y deteccion trempan di diabetes.
Den cuadro di Dia Mundial di Diabetes Departamento di Salud Publico (DVG) ta recorda nos cu decisionnan chikito den loke nos ta come y bebe por tin un gran impacto riba nos salud.
Kico ta Diabetes?
Diabetes ta un malesa unda e curpa no por regula e nivel di sucu (glucose) den sanger corectamente. Esaki ta pasa pasobra e curpa no ta produci suficiente insulina of no por uza e insulina bon.
Con baha consumo di sucu ta yuda?
- Ora bo baha bo consumo di sucu, bo ta evita pa e nivel di sucu den sanger subi. Esaki ta duna bo curpa un man pa mantene bo sucu den sanger stabil, proteha bo salud y preveni complicacionnan serio relaciona cu Diabetes.
- Pa evita malesanan manera Diabetes, e cambio ta cuminsa den bo curpa cu loke bo ta consumi, p'esey e escogencia mester ta pa bo salud!
Kico bo por cambia awe mes?
- Consumi menos sucu: Cambia un 'Energy Drink' pa un koffie preto sin sucu;
- Scoge opcionnan di 0%: Cambia un refresco regular pa esunnan cu nos conoce den mercado como ‘zero’;
- Disfruta sin alcohol y sin sucu: Cambia cerbes tradicional pa cerbes 0%;
- Opta pa refresca cu algo mas saludabel: Cambia Malta pa awa cu gas;
- Awa ta e miho bebida: No bebe mas juice, haci e cambio pa awa.
Corda:
- Cambia bo slok;
- Cambia bo habitonan;
- Evita malesanan manera Diabetes!

