Dia Internacional di Biodiversidad: Sea parti di e accion pa combati perdida di biodiversidad.

E meta principal pa celebra e dia aki ta pa promove e preservacion y uzo duradero di e diverso formanan di bida riba nos planeta. E meta aki ta sinchronisa cu e esfuersonan global pa proteccion di naturalesa, cual ta dirigi riba e preservacion di biodiversidad cu ta crucial pa e stabilidad di e ecosistema diverso, existencia di hende y resiliencia pa cambio climatico. 
Biodiversidad ta consisti di bestia, mata y micro-organismo cu ta forma e mundo y diverso ecosistema. Biodiversidad ta e curason cu ta mantene nos planeta tera na bida.

E tema di 2024 ta e yamada pa tur hende ta parti di e plan, “Be part of the Plan”, cu ta un yamada di accion na tur envolvi pa para y mitiga e perdida di biodiversidad na mundo sosteniendo implementacion di e Kunming-Montreal Global Biodiversity Framework, referi como e ‘Biodiversity Plan’.
E Plan di e Convencion di Biodiversidad ta uno ambicioso cu ta contene e protocolnan y accionnan relata na e convenio.

Na Aruba, Directie Natuur en Milieu (DNM), conhuntamente cu Ministerio di Naturalesa y e agencia di consulta Twyndra Gudde ta formulando e National Biodiversity Strategic and Action Plan (NBSAP), na Papiamento “Plan di Maneho pa Naturalesa”. E documento ta basa riba e Global Biodiversity Framework (GBF) cu ta e resultado di e conferencia di e partidonan na e Convention of Biodiversity (COP 15) na 2022. Esaki ta delinea un cantidad di meta y obhetivo pa proteccion di Biodiversidad global. E "Plan di maneho pa Naturalesa" ta den fase di formulacion y pa juni 2024 esaki lo ta finalisa. Tin varios proyecto local andando cu ta den cuadro di algun di e metanan di GBF. Por ehempel esun di 30X30- cu ta encera proteccion di 30% di e area terestre, costal y marino di Aruba pa aña 2030. Tambe tin proyecto cu ta encera restauracion di 30% di area terestre na Aruba. Di parti di National Climate Resilience Council (NCRC) ta enfoca riba reduccion di e impacto cu clima tin riba biodiversidad aki na Aruba.

E plan di Biodiversidad en general ta ofrece oportunidad di cooperacion y forma diferente asociacion entre gruponan den nos comunidad. Gobierno, comunidad, legisladonan, comercio y individuonan ta encurasha pa aporta y sostene e implementacion di e plan di Biodiversidad. Un y tur tin un rol den esaki pa ta parti di e plan. E dia Internacional di Biodiversidad ta e momento pa mantene momentum pa asina proteha y restora naturalesa, compartiendo su beneficio un manera husto, inverti den y colabora cu naturalesa.

Areanan urbanisa ta contribui na e perdida di biodiversidad, pero tin potencial y ta parti di e solucion.
Iniciativanan di practica sostenibel of planificacion di urbanisacion  innovativo ta aporta na e Plan.

Hubentud su escogencia y accion tambe ta accelera e transformacion cu tin mester pa activa e metanan y obhetivonan pa e plan:

• Adapta practicanan diario cu ta sostenibel; 
• no malgasta awa y energia;
• uza tasnan di compra of productonan cu no ta uza hopi emboltura pa reduci bo impacto. 
• incentiva inversion cu ta conserva ecosistema local;
• balora practicanan di bo mesun cultura local cu ta inclui esunan intangibel;
• cumpra y scoge fruta y berdura di temporada y di produccion local prome; 
• sostene ecoturismo;
• inclui biodiversidad den e modelo di negoshi y sea transparente di e impacto cu bo negoshi tin riba biodiversidad.