Dia Internacional di Aire Limpi pa Cielo Blauw: e di seis biaha cu Nacionnan Uni ta observa e dia aki

E campaña di e aña aki ta conecta aire limpi cu tema di deporte, rendimento y resistencia uzando e palabra careda cu ta referi na un competencia of careda fuerte. Polucion di aire ta e di dos factor principal di riesgo di morto mundial. E ta causa mas of menos 8.1 miyon morto prematuro pa aña asocia cu malesa manera atake celebral (stroke), malesa di curason, cancer di pulmon y infeccion respiratorio agudo. 

E Asamblea General di Nacionnan Uni na 2019 a asigna dia 7 di september como Dia Internacional Di Aire Limpi pa Cielo Blauw. E resolucion di e Asamblea General di Nacionnan Uni ta enfatisa e importancia y necesidad urgente pa conscientisa publico na tur nível pa promove y facilita accionnan pa mehora calidad di aire. Directie Natuur en Milieu (DNM) ta uni na e parti di conscientisacion di e topico pa asina Aruba ta informa di e efectonan cu calidad di aire tin pa salud di hende y bestia. Na Aruba casi tur dia nos ta disfruta di e cielo blauw pero hopi biaha nos no sa di e contaminacion cu por presente den e aire.

Aki tin algun hechonan manera comparti pa Nacionnan Uni:

• Nos prome contacto cu mundo ora nos nace ta aire, oxigeno. Nos ta inhala aire 12 biaha pa minuut.
• Aire ta mantene nos na bida of por causa nos morto.
• 99% di hende na mundo ta respira aire contamina.
• Polucion di aire ta e riesgo mas grandi pa salud ambiental di nos tempo.
• Polucion den aire ta acelera cambio climatico, ta causa perdida economico y ta reduci productividad di agricultura.
• Polucion di aire no tin frontera, p’esey nos tur tin e responsabilidad pa proteha nos atmosfera y garantisa calidad di aire saludabel pa tur. 

Pa medio di cooperación, inversion, y esfuersonan colectivo nos por reduci contaminacion di aire y garantiza aire limpi pa tur hende. Riba e Dia Internacional di Aire Limpi pa Cielo Blauw, nos ta haci un yamada na tur hende pa uni na e careda pa solucion. Combatiendo contaminacion di aire na un manera proactivo, nos por logra transforma y garantisa aire limpi y saludabel pa tur.

Polucion di aire ta bini di hopi fuente, manera kimamento di fosil fuel y biomasa, cu ta contribui na emision di gasnan cu ta causa keintamento di nos planeta. Mescos cu  cambio di clima, polucion di aire ta afecta tur hende, pero ta afecta specialemente hende na estado, baby, mucha, hende grandi, hende cu ta biba den pobresa y comunidadnan historicamente margina.

E estadisticanan por yuda nos compronde e magnitud di e problema: 

• 99% di di poblacion mundial ta hala aire contamina aden;
• Na 2021, polucion di aire a causa di 8.1 miyon morto, di cual mas cu 90% ta malesa no transmitibel;
• Mas cu 700.000 morto di muchanan bou di cinco aña debi na polucion di aire.
• Pa 2050 polucion di aire por destrui mita di produccion di agricultura mundial.
• Ta calcula cu economia mundial ta perde 8.1 biyon pa aña, ekivalente na 6.1% di e GDP mundial debi na cuidi disalud y productividad perdi. 

Yamada pa accion

E Agenda 2030 pa Desaroyo Sostenibel (SDG) ta enfatisa y urgi reducion di polucion di aire pa por logra e metanan proponi. E meta ta garantisa un ambiente limpi, saludabel y sostenibel crucial pa derechonan humano y bienestar general. Uni na e Careda pa Aire Limpi, pa acelera solucionnan pa garantisa aire limpi pa tur.